سپریم کورٹ نوں تباہ کرن دی کوشش کیتی تے احتجاجی تحریک شروع کردیاں گے، عمران خان
راولپنڈی(بیورروپورٹ)بانی پی ٹی آئی عمران خان نے آکھیا اے کہ سپریم کورٹ نوں تباہ کرن دی کوشش کیتی تے اسیںملک بھر وچ احتجاجی تحریک شروع کراں گے۔190 ملین پانڈ ریفرنس دی سماعت بعد اڈیالہ جیل وچ صحافیاں نال غیر رسمیگل بات کر دیاں ہو یاں عمران خان نے آکھیا کہ ادارہ سب دا اے صرف آرمی چیف دا نہیں، پوری قوم لئی اہم اے کہ ادارہ مضبوط ہوئے ، جیہڑا کم دشمن نہیں کر سکیا اوہ ایہ خود کر کے ادارے نوں نقصان پہنچا رہے نیں، اداریاں اُتے کرپٹ تے نااہل لوگ بٹھا دتے جان تے قوم تباہ ہوجائے گی۔اونہاں نے آکھیا کہ پاکستان کرکٹ ٹیم بنگلہ دیش توں وائٹ واش ہوگئی ایس توں بھیہڑی شکست کیہ ہوئے گی، ایسا کیہڑا ایٹم بمب پھٹیا کہ 3ورھیاں وچ ساڈی کرکٹ بنگلہ دیش توں تھلے چلی گئی تے تباہ ہوگئی؟ تُسی سفارشی بٹھا دتے محسن نقوی دی کیہ قابلیت اے،وڈے صاحب نے اپنا چیئرمین پی سی بی رکھ لئیا ایہ کرپٹ تے فراڈیا اے، اوس نے الیکشن تے کنک فراڈ کیتا، اوس نوں وزیر داخلہ تے چیئرمین پی سی بی وڈے صاحب نے اپوائنٹ کیتا، اوس نے کرکٹ دا بیڑا غرق کر دتا، رمیز راجہ میرا رشتہ دار نہیں سی اک پروفیشنل کرکٹر سی جس نوں میں چیئرمین پی سی بی بنایا۔عمران خان دا کہنا سی کہ چیف جسٹس نے اڑھائی مہینے توں نیب ترمیم اپیل دا فیصلہ محفوظ کررکھیا اے، انتظار کیتا جا رہیا اے کہ مینوں 190 ملین پانڈ ریفرنس وچ سزا ہوئے تے اوہ نیب ترمیم دا فیصلہ سنان، نیب ترمیم خلاف اپیل پاروںشہباز شریف دے4، نواز شریف دے 5، زرداری تے اوس دے فرنٹ میناں دے 9 ریفرنس فریز نیں۔اونہاں نے آکھیا کہ نیب نے القادر یونیورسٹی دا وڈاڈونیشن بند کردتا تاکہ یونیورسٹی بند ہوجائے اگر القادر یونیورسٹی بند ہوگئی تے میرا کوئی نقصان نہیں ہوئے گا، شوکت خانم اسپتال بند ہو گیا تے مریضاں نوں 10 گنا وَدھ خرچ کر کے علاج کرانا پئے گا۔عمران خان نے آکھیا کہ مینوں قید تنہائی وچ رکھیا گیا اے، صرف 3 ملاقاتاں دے سوا سیل وچ ہی رہندا ہاں، میرا سیل تندور بن جاندا اے کَدبی نہیں آکھیا کہ مشکلاں نیں، بالاں نال گل نہیں کرائی جاندی، صرف اوس دی شکایت دی اوسی دی مینوں تکلیف اے۔اونہاں نے ہور آکھیاکہ ہُن ایہ سپریم کورٹ اُتے حملہ کر رہے نیں، صرف سپریم کورٹ ہی اک شناخت بچی اے ہُن ایہ اوس نوں تباہ کرن جارہے نیں، اونہاں نے سپریم کورٹ نوں تباہ کرن دی کوشش کیتی تے اسیںملک بھر وچ احتجاجی تحریک شروع کراں گے۔
