قتل کرن دے بعد 7 سالہ بھانجی نال زیادتی کرن والے ماموں دے سنسنی خیز انکشافات

درندہ صفت سفاک ماموں واردات دے بعد گھر والیاں نال مل کے بچی نوں لبھدا رہیا

راولپنڈی (بیورورپورٹ) اپنی سگی 7 سالہ بھانجی نوں قتل کرن دے بعد ایس نال زیادتی کرن والے ماموں نے تفتیش دے دوران سنسی خیز انکشافات کیتے نیں۔ پولیس نے 7 سالہ بچی نال زیادتی تے قتل کیس دے سنسنی خیز انکشافات دی تفصیلات جاری کر دتیاں۔ مندرہ دے علاقے وچ 7 سالہ بچی دے قتل تے زیادتی کیس دے گرفتار ملزم نوں حراست توں چھڈان لئی ملزماں نے پولیس پارٹی اُتے فائرنگ کیتی، ایس دوران زیر حراست ملزم شدید زخمی ہوگیا، جہڑا ہسپتال منتقلی دے دوران ہلاک ہو گیا جدکہ ملزم فائرنگ کردے ہوئے فرار ہو گئے۔ رپورٹ دے مطابق بچی دے قتل تے زیادتی وچ ملوث ملزم سنیل بچی دا سگا ماموں سی، جنہوں پچھلی رات گرفتار کیتا گیا سی۔ ملزم نوں آلہ ضرب دی برآمدگی لئی لے جایا جا رہیا سی کہ ایسے دوران ملزماں نے فائرنگ کر دتی۔ پولیس ولوں تفتیش دے دوران ملزم دی سفاکیت دے حوالے نال ہولناک انکشافات دی تفصیل جاری کیتی گئی اے، جس دے مطابق ملزم سنیل آئس دا نشہ کردا سی تے مقتولہ دے گھر دے نیڑے ہی رہندا سی۔ بچی (سگی بھانجی) نوں ملزم ایسٹر دے دن بہلا پھسلا کے کھان پین دی چیزاں دا آکھ کے نال لے کے گیا تے زیر تعمیر گھر دی عمارت وچ لے جا کے ایس نال زیادتی دی کوشش کیتی۔ ایس موقع تے بچی دے شور کرن تے سفاک ملزم نے قینچی نال بچی دا گلا کٹیا۔ قینچی نال گلا کٹن دے بعد ملزم نے بچی دے سر اُتے اِٹ نال وار کیتا تے فیر گلا گھُٹ کے قتل کیتا۔ سفاک درندہ صفت ملزم نے تفتیش دے دوران انکشاف کیتا کہ ایس نے قتل کرن دے بعد بچی نال زیادتی کیتی۔ ملزم گھنائونی واردات دے بعد گھر آ گیا تے بعد وچ فیملی نال بچی نوں لبھدا رہیا۔ پولیس نے ملزم دی مشکوک حرکتاں اُلتے ایہنوں شامل تفتیش کیتا تے ملزم نے اپنے مکروہ فعل دا اعتراف کیتا۔ پولیس حکام دا آکھنا اے کہ خواتین تے بچے ریڈ لائن نیں، ایہناں دے خلاف جرائم ناقابل برداشت نیں۔ بالاں دے خلاف جرماں وچ ملوث ملزماں نال آہنی ہتھوں نمٹیا جائے گا۔