چین نال سپیس ٹیکنالوجی سنے ہورناں شعبیاں وچ تعاون ودھان دے خواہاں ہاں، وزیراعظم

وزیراعظم محمد شہباز شریف نال چین توں تعلق رکھن والی سپیس ٹیکنالوجی کمپنی گلیکسی سپیس دے وفد دی ملاقات

اسلام آباد (بیورورپورٹ) وزیراعظم شہباز شریف نے آکھیا اے کہ چین نال سپیس ٹیکنالوجی، سپیس سیٹلائٹ، ٹیلی کمیونیکیشن تے سیٹلائٹ انٹرنیٹ سنے ہورناں شعبیاں وچ تعاون ودھان دے خواہاں ہاں۔ وزیراعظم محمد شہباز شریف نال چین توں تعلق رکھن والی سپیس ٹیکنالوجی کمپنی گلیکسی سپیس دے وفد نے چیئرمین گلیکسی سپیس زو منگ دی قیادت وچ ملاقات کیتی۔ ایس موقع تے وزیراعظم دا آکھنا سی کہ پاکستان سپیس ٹیکنالوجی شعبے نوں انتہائی اہمیت دے رہیا اے، چین ساڈا انتہائی قابل اعتماد دوست تے سٹریٹجک شراکت دار اے۔ گلیکسی سپیس دے وفد نے پاکستان دی سپیس ٹیکنالوجی انڈسٹری وچ سرمایہ کاری تے پاکستانی سپیس ٹیکنالوجی دے اداریاں تے نجی ٹیلی کام کمپنیاں نال مشترکہ منصوبیاں دے حوالے نال گہری دلچسپی دا اظہار کیتا۔ وفد دے ارکان نے گل بات وچ آکھیا کہ وزارت انفارمیشن ٹیکنالوجی تے ٹیلی کام تے سپارکو دے حکام نال ملاقاتاں انتہائی مفید رہیاں۔ وفد نے پاکستان وچ پرتپاک میزبانی تے حکومت پاکستان دا شکریہ ادا کیتا۔ ملاقات وچ وفاقی وزیر اقتصادی امور احد خان چیمہ، وفاقی وزیر انفارمیشن ٹیکنالوجی تے ٹیلی کام شزا فاطمہ، وزیر دے مشیر ڈاکٹر توقیر شاہ تے متعلقہ سرکاری اداریاں دے افسراں نے رلت کیتی۔