مسلم لیگ (ن) دے وزراء بیان بازی کر رہے نیں، نواز، شہباز اپنے لوکاں نوں سمجھائون، شرجیل میمن

(ن) لیگ اپنے وزراء نوں سمجھائے ورنہ فیر شاید اسیں اپنے ترجماناں نوں روک نہ سکئے، ایہو روش رہی تے گل نہیں بنے گی

کراچی (بیورورپورٹ) سندھ دے سینئر وزیر شرجیل انعام میمن نے آکھیا اے کہ مسلم لیگ (ن) توں تعلق رکھن والے کجھ وزراء بیان بازی کر رہے نیں، شہباز شریف تے نواز شریف اپنے لوکاں نوں سمجھائون، ایہو روش رہی تے گل نہیں بنے گی۔ کراچی وچ پارٹی دے سینئر رہنما ناصر حسین شاہ تے عاجز دھامراہ نال مشترکہ پریس کانفرنس کردے ہوئے ایہناں دا آکھنا سی کہ متنازع کنالز اُتے پیپلز پارٹی دا واضح موقف رہیا اے، کوشش اے کہ مسئلے نوں حل کیتا جائے، لوکاں دے جائز خدشات نیں۔ نگراں حکومت دے دوران ارسا نے سرٹیفکیٹ جاری کیتا تے آکھیا کہ کنالز بنائو پانی موجود اے۔ ایہناں دا آکھنا سی کہ ایس ویلے وی سندھ دے نمائندے نے مخالفت کیتی سی، جہڑے لوک آکھدے نیں پیپلز پارٹی بعد وچ جاگی ساڈے کول ریکارڈ موجود اے کہ وزیراعلیٰ سندھ نے مخالفت کیتی، 16 جون نوں وزیراعلیٰ نے سمری سائن کیتی تے 3 جولائی نوں سمری وفاق نوں اپڑ چُکی سی۔ شرجیل میمن نے آکھیا کہ ساڈے کول سارے خطوط موجود نیں جہڑے اسیں کنالز دی مخالفت کیتی، پیپلز پارٹی دا ایہو موقف اے کہ متنازعہ کنالز نہیں بنائے جائون، جتھوں تسیں پانی لیندے ہو ایہناں نوں وی دس دیو کہ اسیں تہاڈا پانی لے رہے ہاں، صدر مملکت نے جوائنٹ سیشن وچ آکھیا کہ اسیں ایس منصوبے نوں سپورٹ نہیں کر سکدے، پہلے دن توں کنالز دے معاملے اُتے پیپلز پارٹی دا واضح موقف اے۔ جتھے جتھے ساڈی میٹنگز ہوئیاں اوتھے اسیں مخالفت کیتی۔ شرجیل انعام میمن دا آکھنا سی کہ پنجاب وچ زیر زمین مٹھا پانی موجود اے ایس نال کاشتکاری ہو سکدی اے۔ رانا ثناء اللہ دا دو دن پہلے فون آیا تے اوہناں نے آکھیا وزیر اعظم صاحب ایس معاملے نوں حل کرنا چاہندے نیں، رانا ثناء اللہ نال کل تے اج وی گل ہوئی، شہباز شریف پورے ملک دے وزیر اعظم نیں، لوکاں دے خدشات ختم کرنے چاہیدے نیں۔