مراد علی شاہ نوں گنڈاپور توں مختلف ہونا چاہیدا، سندھ حکومت 16 سالہ کارکردگی وکھائے، عظمیٰ بخاری

پنجاب کی ترقی اور خوشحالی اب دو صوبوں کی حکومتوں کے اعصاب پر سوار ہو چکی ہے، صوبائی وزیر اطلاعات

لہور (سٹی رپورٹر) وزیراطلاعات پنجاب عظمیٰ بخاری نے آکھیا اے کہ پنجاب نے اک ورھے وچ کسانں نوں تریخی پیکیج دتا، سندھ 16 سالہ کارکردگی دسے۔ وزیراعلیٰ سندھ سید مراد علی شاہ دی پریس کانفرنس اُتے شدید ردعمل دا اظہار کردے ہوئے وزیر اطلاعات پنجاب عظمیٰ بخاری نے سوالات اٹھا دتے۔ اوہناں نے آکھیا کہ مراد علی شاہ نوں سندھ دے کساناں توں بہتی پنجاب دے کساناں دی فکر لاحق اے۔ عظمیٰ بخاری دا آکھنا سی کہ پنجاب دے کساناں دی فکر کرن لئی پنجاب دے وارث خود موجود نیں۔ کیا سندھ وچ کاشتکار نہیں؟ تے کیا سندھ حکومت نے گندم دی قیمت مقرر کیتی اے؟ اوہناں نے ہور سوال اٹھایا کہ کیا سندھ حکومت نے کساناں کولوں گندم خرید لئی اے؟ اوہناں نے آکھیا کہ مراد علی شاہ تے ایہناں دی جماعت پچھلے 16 ورھیاں توں سندھ وچ حکمران نیں، ہون ایہناں نوں اپنی کارکردگی دسنی چاہیدی۔ وزیراعلیٰ پنجاب مریم نواز نے اک ورھے وچ پنجاب دے کساناں نوں 110 ارب روپے دا تریخی پیکیج دتا اے۔ صوبائی وزیر نے آکھیا کہ پنجاب دے کساناں نوں کسان کارڈ، گرین ٹریکٹر تے سپر سیڈر وی فراہم کیتے جا چُکے نیں۔ مریم نواز نے ٹیوب ویلز دی سولرائزیشن تے گندم اُتے 15 ارب روپے دا پیکیج دتا اے۔ اوہناں نے دعویٰ کیتا کہ پنجاب وچ ایس ورھے ریکارڈ گندم دی پیداوار ہوئی اے تے آئون والے ورھے ایس توں وی بہتی پیداوار حاصل ہوویگی۔ عظمیٰ بخاری نے آکھیا کہ پنجاب دی ترقی تے خوشحالی ہون دو صوبیاں دی حکومتاں دے اعصاب اُتے سوار ہو چُکی اے۔ اوہناں نے الزام لگایا کہ مراد علی شاہ سندھ دی مرکزی شاہراہ بند کرن والے مظاہرین دی حمایت کر رہے نیں۔ مراد علی شاہ نوں گنڈا پور توں مختلف نظر آئونا چاہیدا۔