عورتاں اُتے تشدد دے خلاف آواز چُکنا اجتماعی، سماجی تے اخلاقی ذمہ داری اے: مراد علی شاہ

کراچی (بیورورپورٹ) وزیراعلی سندھ سید مراد علی شاہ نے آکھیا اے کہ عورتاں تے تشدد دے خلاف آواز چُکنا اک اجتماعی، سماجی، قنونی تے اخلاقی ذمہ داری اے۔عورتاں تے تشدد مکائون دے عالمی دن تے پیغام جاری کردیاں وزیراعلی سندھ سید مراد علی شاہ نے آکھیا اے کہ عورتاں تے تشدد ناقابل برداشت اے، اج دا دن عورتاں تے بچیاں دے خلاف تشدد مکاون تے سماجی شعور اُجاگر کرن دی یاد دہانی اے، عورتاں تے بچیاں تے تشدد مکاون لئی سرمایہ کاری دی اہمیت اُجاگر کیتی جاوے۔اوہناں آکھیا اے کہ تشدد دے خلاف آواز چُکنا اک اجتماعی، سماجی، قنونی تے اخلاقی ذمہ داری اے، کسے وی نوعیت تے کسے وی صورت وچ تشدد ناقابل برداشت تے قابل مذمت اے۔وزیراعلی نے آکھیا کہ عورتاں دے خلاف تشدد روکن وچ سماج دے ساریاں طبقیاں نوں کردار ادا کرن دی لوڑ اے، جدکہ سندھ حکومت نے عورتاں تے تشدد روکن لئی جامع تے موثر قنون وضع کیتے نیں، ڈومیسٹک وائلنس ایکٹ 2013 عورتاں نوں گھریلو تشدد توں قنونی تحفظ دیندا اے تے چائلڈ میریج ریسٹرینٹ ایکٹ چھوٹی عمر وچ ویاہ روکن لئی مضبوط قنونی فریم ورک اے۔اوہناں آکھیا اے کہ ویمن ایگری کلچرل ورکرز ایکٹ 2019 عورتاں نوں برابر دی اُجرت تے تحفظ دیندا اے، حالانکہ سندھ حکومت نے ورک پلس ہراسانی دے خلاف موثر قنونی تحفظ مہیا کیتا اے، ہراسانی دے خلاف قنون دے نفاذ لئی صوبائی محتسب فعال کردار ادا کر رہیا اے، عورتاں نوں ترقی دے برابر موقع دینا سندھ حکومت دی پہلی ترجیح اے۔ ایہہ واضح اے کہ معیشت تے سماجی ترقی وچ عورتاں دا کردار بنیادی اہمیت رکھدا اے۔ مراد علی شاہ نے ہور آکھیا اے کہ تشدد توں پاک سماج ہی ترقی، انصاف تے سماجی ہم آہنگی دی بنیاد رکھ سکدا اے، سندھ کمیشن آن دی ایسٹیٹس آف ویمن عورتاں دے حقوق تے تشدد دے معاملات دی مانیٹرنگ وچ موثر ادارہ اے۔