ایتھوپیا دے پھٹے آتش فشاں دی راکھ پاکستان تک پہنچ گئی، گوادر دے قریب راکھ دے بادل ریکارڈ
ایتھوپیا وچ پھٹے آتش فشاں دی راکھ دے بادل پاکستان تک پہنچ گئے۔ گوادر دے جنوبی علاقیاں وچ ایہہ راکھ دے بادل 60 ناٹیکل میل دی دوری ’تے ریکارڈ ہوئے نیں۔
ترجمان محکمہ موسمیات انجم نذیر ضیغم دے مطابق محکمہ موسمیات نے آج لگاتار دو وولکینک ایش الرٹ جاری کیتے۔ 45 ہزار فٹ دی بلندی ’تے اڑن والی پروازاں لئی وولکینک الرٹ جاری کیتے گئے، کیوں کہ پاکستانی فضائی حدود استعمال کرن والیاں بین الاقوامی پروازاں عام طور ’تے 45 ہزار فٹ یا اس توں وادھ ’تے اُڑدیاں نیں۔
ترجمان دے مطابق بلند پرواز ہوائی جہازاں دے عملے نوں راکھ دے بادل بارے احتیاط کرن دا مشورہ دتا گیا ہے۔ آتش فشاں توں اٹھن والے راکھ دے بادل یمن، عمان، بھارت تے شمالی پاکستان تک پھیل گئے نیں۔
ایہہ آتش فشاں، جس دا ناں حیلی گوبی ہے، ایتھوپیا دی راجدھانی ادیس ابابا توں تقریباً 800 کلومیٹر شمال مشرق وچ واقع ہے۔ ترجمان دے مطابق اس آتش فشاں دی بلندی تقریباً 500 میٹر ہے تے ایہہ رِفٹ ویلی وچ واقع ہے، جتھے دو ٹیکٹونک پلیٹاں ملدییاں نیں تے زمین دے اندر شدید جغرافیائی سرگرمیاں ہوندیاں نیں۔
