گوجرہ وچ لاؤڈ اسپیکر ’تے درود شریف پڑھن ’تے امام مسجد خلاف مقدمہ، وکلا تے عوام دا شدید ردعمل
ضلع ٹوبہ ٹیک سنگھ دے علاقے گوجرہ وچ اس وقت غیر معمولی صورتحال پیدا ہو گئی جدوں تھانہ سٹی نے اذان توں پہلاں لاؤڈ اسپیکر ’تے درود شریف پڑھنے ’تے امام مسجد خلاف مقدمہ درج کر لیا۔ اس کارروائی توں بعد شہر اندر وکلا تے عوامی حلقیاں وچ شدید ردعمل سامنے آیا۔
سابق صدر بار ایسوسی ایشن گوجرہ، توقیر اشرف خان ایڈووکیٹ نے مقدمہ خارج نہ ہون ’تے احتجاجی اقدام لیتے ہوئے ڈی ایس پی آفس دے سامنے مسجد وچ جا کے کھلے عام درود و سلام پڑھیا۔ اوہناں ڈی ایس پی نوں مخاطب کر کے آکھیا کہ “جے درود شریف پڑھنا جرم اے تاں فیر ساڈے خلاف وی مقدمہ درج کرو۔”
اوہناں دا مؤقف سی کہ ملکی قوانین دے مطابق اذان توں پہلاں یا بعد لاؤڈ اسپیکر ’تے درود شریف پڑھن دی اجازت موجود اے، اس لئی امام مسجد خلاف مقدمہ بے بنیاد اے۔
دوجی پاسے وکلا نے مقدمے دے اندراج خلاف شدید احتجاج کیتا تے گوجرہ بار نے ہڑتال دا اعلان کر دتا۔ وکلا نے تھانہ سٹی گوجرہ وچ ڈی ایس پی تے مقدمہ درج کراؤن والے مدعی خلاف کارروائی دی درخواست وی جمع کرا دتی۔
ایہہ معاملہ مذہبی آزادی، لاؤڈ اسپیکر قانون تے اس دی درست تشریح بارے مقامی سطح ’تے اک اہم بحث بن چکیا اے۔
