پارلیمنٹ دا مشترکہ اجلاس کل طلب ملک دی مجموعی صورتحال تے اہم قنون سازی اُتے غور
اسلام آباد (این این آئی) وفاقی حکومت ولوں پارلیمنٹ دا مشترکہ اجلاس کل منگل نوں طلب کیتے جان دا امکان اے۔ ایس اجلاس وچ نہ صرف اہم قانون سازی اُتے غور کیتا جائے گا بلکہ ملک وچ امن و امان تے سلامتی دی مجموعی صورتحال دا جائزہ وی لیا جائے گا۔
میڈیا رپورٹاں مطابق، مشترکہ اجلاس نو مہینے مگروں ہووے گا، جتھے پیپلز پارٹی دے چیئرمین بلاول بھٹو زرداری تے جمعیت العلمائے اسلام دے سربراہ مولانا فضل الرحمن وی خطاب کرن گے۔
قومی اسمبلی تے سینیٹ وانگوں مشترکہ اجلاس وچ قائد حزب اختلاف دی نشست خالی رہے گی، تاہم حزب اختلاف مشترکہ اجلاس وچ بانی تحریک دی حراست تے ملاقاتاں تے عائد پابندی دے خلاف احتجاج کرے گی۔
ذرائع دے مطابق، پارلیمنٹ دے مشترکہ اجلاس توں پہلاں حکومتی، اتحادی جماعتاں تے اپوزیشن دی پارلیمانی پارٹی دے اجلاس وی ہوون گے تاکہ اجلاس دے ایجنڈے تے حکمت عملی طے کیتی جا سکے۔
