منگیتر دے کہن تے شہری نوں قتل کرن والے ملزم دی سزائے موت کالعدم نامعلوم دے خلاف مقدمہ درج ہویا فیر بعد وچ نامزد کویں کیتا‘ جسٹس شہرام سرور
لہور (سٹی رپورٹر) لہور ہائیکورٹ نے منگیتر دے کہن تے شہری نوں قتل کرن والے ملزم دی سزائے موت کالعدم قرار دے دتی۔ لہور ہائیکورٹ دے جسٹس شہرام سرور دی سربراہی وچ 2 رکنی بنچ نے اپیل تے سماعت کیتی۔ عدالت نے ملزم نادر دی اپیل نوں منظور کردیاں ہوئیاں رہا کرن دا حکم دے دتا۔ جسٹس شہرام سرور نے کہیا کہ نامعلوم کے خلاف مقدمہ درج ہویا فیر بعد وچ نامزد کویں کیتا۔ مدعی وکیل نے دسیا کہ ملزم نادر توں پستولاں تے موٹر سائیکل ریکور ہوئی، ملزم دی سی ڈی آر ملزم نوں واقع توں جوڑدی اے، استدعا اے کہ عدالت ملزم دی اپیل خارج کرن دا حکم دے۔ لہور ہائیکورٹ نے وکیل مدعی دی استدعا مسترد کردیاں ہوئیاں منگیتر دے کہن تے شہری نوں قتل کرن والے ملزم دی سزائے موت کالعدم قرار دے دتی۔ ملزم نادر دے خلاف تھانہ شیخم قصور وچ مقدمہ درج اے، ملزم نادر نوں ٹرائل کورٹ نے سزائے موت دی سزا سنائی سی۔
