ادارے دے کسے ملازم نوں نوکری توں فارغ نہیں کیتا جاویگا، وزیر قنون

سینیٹ توں نیشنل ایگری ٹریڈ اینڈ فوڈ سیفٹی اتھارٹی دے قیام دا بل منظور
اسلام آباد (بیورورپورٹ) سینیٹ نے نیشنل ایگری ٹریڈ اینڈ فوڈ سیفٹی اتھارٹی بل 2025 منظور کر لیا جہدے تحت اتھارٹی دا قیام عمل وچ لیایا جاویگا۔ جمعے نوں سینیٹ اجلاس بریزائنڈنگ افسر شہادت اعوان دی زیر صدارت ہویا۔ بل وفاقی وزیر قنون اعظم نذیر تارڑ نے ایوان وچ پیش کیتا۔ اصولی پالیسی دی نگرانی و عمل درآمد توں متعلق سالانہ 4 سالہ رپورٹس سینیٹ وچ پیش کیتیاں گئیاں، رپورٹاں وی ایوان وچ وزیر قنون اعظم نذیر تارڈ نے پیش کیتیاں۔وزیر قنون اعظم نذیر تارڑ نے کہیا کہ ایہ بل 14 نومبر نوں رانا تنویر حسین نے ایوان وچ پیش کیتا سی، بل تے آخری لمحات وچ اعتراضات چُکے گئے سن، جنہاں ترامیم تے اعتراض سی اوہ سب واپس لے لئیاں گئیاں نیں۔ وزیر قنون نے کہیا کہ ادارے دے کسے ملازم نوں نوکری توں فارغ نہیں کیتا جاویگا ، متاثر ہون والے ملازمین نوں سرپلس پول بھجوا دتا جاویگا۔ سینیٹر اسد قاسم نے ایف بی آر ولوں فائلرز نوں بینک بیلنس تے لین دین رقم توں متعلق ٹیکسٹ پیغامات بھجوان توں متعلق توجہ دلاؤ نوٹس جمع کروایا۔ سینیٹر اسد قاسم نے سوال چُکیا کہ ایف بی آر ساڈے مالی لین دین دی اطلاعات کس طرح انج نشر کر رہیا اے؟ ، ایتھے تے لوک اپنیاں بیویاں توں وی بینک بیلنس چھپاندے نیں ، میرا بطور ٹیکس گزار ایہ حق اے کہ میں بینک بیلنس توں متعلق معلومات اپنے فون دے ذریعے نہیں جاننا چاہندا، ایہ معاملات راز داری دے ہوندے نیں جو بطور ٹیکس گزار میرا حق بندا اے۔ وفاقی وزیر ڈاکٹر طارق فضل چوہدری نے کہیا کہ ایہ پیغامات صرف متعلقہ ٹیکس گزار نوں ای بھجوائے جاندے نیں، ایف بی آر نوں قوانین دے تحت ایہ اختیار حاصل اے۔ صدر نشین نے معاملہ خزانے و محاصل دی قائمہ کمیٹی نوں بھجوا دیا۔