صرف مائیک چُک لین نال کوئی صحافی نہیں بن جاندا ‘ زارا اکبر
لہور(سٹی رپورٹر) مشہور اداکارہ زارا اکبر نے اپنے بیان وچ آکھیا کہ صرف مائیک چُکن نال کوئی صحافی نہیں بن جاندا، پاکستان وچ ہر کوئی کسے دی پگڑی اچھال کے شہرت حاصل کرن دا رواج چل پیا اے، میرے خلاف اک وی لاگر نے الزام لایا اے تے میں اوہدے خلاف قنونی چارہ جوئی کراں گی۔ خصوصی گل کردیاں زارا اکبر نے کہیا کہ صحافت اک سنجیدہ شعبہ اے پر کجھ لوکاں نے ایہہ ٹکے ٹوکری بنا دتا اے، جہڑے اصل صحافی نیں اوہ خبر دی تحقیق کردے نیں، کسے تے لگائے گئے الزام بارے متعلقہ شخص کولوں پچھدے نیں، پر اج کل دی صحافت دا کوئی سر پیر نہیں، جس دے ہتھ وچ موبائل تے مائیک آ گیا اوہ صحافی بن جاندا اے۔ اوہناں نے کہیا کہ میں صحافتی تنظیماں توں وی ایہہ مطالبہ کراں گی کہ ایہناں لوکاں دا محاسبہ کیتا جاوے تاکہ کوئی کسے دی پگڑی نہ اچھال سکے۔
