عرفان صدیقی دے انتقال توں خالی ہون والی نشست تے عابد شیر علی بلامقابلہ سینیٹر منتخب
ن لیگ نوں عوامی خدمت پاروں ہر محاذ تے فتح نصیب ہو رہی، وزیراعظم شہباز شریف دی عابد شیر علی نوں مبارکباد
لہور (این این آئی) پاکستان مسلم لیگ (ن) دے رہنما عرفان صدیقی دے انتقال توں خالی ہون والی سینٹ دی نشست تے عابد شیر علی بلامقابلہ سینیٹر منتخب ہو گئے۔ عرفان صدیقی دے انتقال توں سینیٹ دی پنجاب توں خالی ہون والی جنرل نشست تے تن امیدواراں عابد شیر علی،عبدالجبار تے احسان افضل خان نے کاغذات نامزدگی جمع کرائے سن جنھاں نوں سکروٹنی مگروں درست قرار دتا گیا سی۔ دو امیدواراں احسان افضل خان تے عبدالجبار ولوں اپنے کاغذات نامزدگی واپس لے لیتے گئے۔ عابد شیر علی دے بلامقابلہ کامیابی دا حتمی نوٹیفکیشن الیکشن کمیشن ولوں جاری کیتا جائے گا۔ مذکورہ نشست تے ووٹنگ 24 دسمبر نوں شیڈول سی۔ علاوہ ازیں وزیراعظم شہباز شریف نے عابد شیر علی نوں سینیٹ انتخابات وچ بلامقابلہ کامیابی تے مبارکباد دیندے ہوئے مستقبل لئی نیک خواہشات دا اظہار کیتا اے۔ وزیراعظم نے اپنے سُنیہے وچ آکھیا کہ اللہ دے فضل و کرم توں مسلم لیگ ن نوں عوامی خدمت پاروں ہر محاذ تے فتح نصیب ہو رہی اے۔
