چیف آف ڈیفنس فورسز فیلڈ مارشل عاصم منیر دے اعزاز وچ تقریب
راولپنڈی (این این آئی) ملک دے پہلے چیف آف ڈیفنس فورسز (سی ڈی ایف) مقرر کیتے جان مگروں فیلڈ مارشل سید عاصم منیرنوں گارڈ آف آنر پیش کیتا گیا۔ جنرل ہیڈ کوارٹرز (جی ایچ کیو) وچ تنوں مسلح افواج ولوں گارڈ آف آنر پیش کیتا گیا۔ تفصیلات دے مطابق ملک دے پہلے چیف آف ڈیفنس فورسز مقرر کیتے جان مگروں چیف آف آرمی سٹاف (COAS)فیلڈ مارشل عاصم منیر نوں پیر دے دن راولپنڈی وچ جی ایچ کیو وچ گارڈ آف آنر پیش کیت اگیا۔ تقریب وچ چیف آف نیول سٹاف ایڈمرل نوید اشرف تے پاک فضائیہ دے سربراہ ائیر چیف مارشل ظہیر احمد بابر وی موجود سن۔ جمعہ دے دن آرمی چیف فیلڈ مارشل عاصم منیر دی بطور سی ڈی ایف نامزدگی دا نوٹیفکیشن جاری کیتا گیا جنھوں 1970 دی دہائی مگروں فوجی کمانڈ وچ سب توں وڈی تنظیم نو قرار دتا جا رہیا اے۔ نویں ترتیب دے تحت آپریشنل انتظامی تے سٹریٹجک اختیارات نوں اک واحد عہدے وچ مجتمع کر دتا گیا اے جو آئین دے آرٹیکل 243 وچ 27ویں ترمیم راہیں قائم کیتا گیا۔ ایس ترمیم دے تحت چیئرمین جوائنٹ چیفس آف سٹاف کمیٹی دا عہدہ وی ختم کر دتا گیا۔
