کراچی : ہیوی ٹریفک نے اک دن وچ 3 جاناں لے لئیاں
کراچی (بیورورپورٹ) کراچی دیاں سڑکاں تے دندناندی ہیوی ٹریفک نے اک دن وچ 3 جاناں لے لئیاں۔ میڈیا رپورٹاں موجب سرجانی فور دے نیڑے تیز رفتار واٹر ٹینکر نے موٹر سائیکل سوار نوجوان نوں کچل دتا، متوفی عابد فرسٹ ایئر دا طالبعلم تے 2 بہناں دا اکلوتا بھرا سی، شیرشاہ پل تے ڈمپر دی ٹکر نال موٹر سائیکل تے سوار 29 سالہ نسرین جان توں گئی جدکہ اوہدا شوہر شدید زخمی ہوگیا۔اورنگی ٹاؤن فرید کالونی وچ واٹر ٹینکر نے 4 سالہ سفیان نوں کچل دتا، پُلس نے ٹینکر تحویل وچ لے کے تھانے منتقل کر دتا ۔ رواں سال کراچی وچ ہیوی ٹریفک دے حادثتاں وچ 246 افراد جان گنوا چکے ، سب توں زیادہ ٹریلر دی ٹکر نال 95 افراد لقمہ اجل بنے، ٹینکر حادثے وچ جاں بحق عابد رئیس دی نماز جنازہ ادا کر دتی گئی، وڈی تعداد وچ شہریاں نے شرکت کیتی۔
