کشمیراُ تے گل کرن توں سانوں کوئی نہیں روک سکدا: وزیر خارجہ شاہ محمود قریشی
وزیر خارجہ شاہ محمود قریشی دا کہنا اے بھارت اپنے مسئلیاں توں توجہ ہٹان لئی مسلسل سیز فائر معاہدے دی خلاف ورزیاں کر رہیا اے۔ اک نجی چینل نال گل کردیاں وزیر خارجہ شاہ محمود قریشی آکھیا بھارت نے جہڑا کشمیریاں نال رویہ روا رکھیا ہویا اے، ایس صورتحال وچ بھارت نال گل بات دی کوئی گنجائش نہیں اے تے دنیا بھر وچ کشمیر تے گل کرن توں سانوں کوئی نہیں روک سکدا۔ اوہناں آکھیا بھارت وچ کورونا وائرس دی صورتحال بہت پیچیدہ ہو گئی اے، اوتھے مسلم اقلیت دے نال ناروا سلوک کیتا جا رہیا اے تے اوہناں نوں کورونا وائرس پھیلان دا ذمہ دار ٹھہرایا جا رہیا اے۔ وزیر خارجہ شاہ محمود قریشی دا کہنا سی دنیا بھر وچ بھارتی پالیسی تے تنقید کیتی جا رہی اے۔ اوہناں دا کہنا سی بھارت مسلسل ایل او سی تے سیز فائر معاہدے دی خلاف ورزیاں کر رہیا اے جہدا مقصد اپنے اندرونی مسئلیاں توں دنیا دی توجہ ہٹانا اے۔
