لہور وچ کورونا دا پھیلاؤ تیز، پیر توں دو ہفتے لئی لاک ڈاؤن کرن تے غور

لہور: صوبائی حکومت کورونا وباء دے ودھدے کیساں پاروں لہور نوں پیر دے دیہاڑ توں دو ہفتیاں لئی لاک ڈاؤن کرن تے غور کر رہی اے، حتمی فیصلہ وزیراعظم عمران خان کرن گے۔ پچھلے دیہاڑ وزیراعلیٰ عثمان بزدار دی زیر صدارت اعلیٰ سطحی اجلاس ہویا جہدے وچ لہور وچ کورونا دے تیز ترین پھیلاؤ دے پیش نظر ہور 2ہفتے دے لاک ڈاؤن دا معاملہ زیر غور آیا۔ فیصلے دی حتمی منظوری اسلام آباد وچ این سی او سی نال مشاورت دے بعد وزیراعظم توں لئی جاوے گی۔ دو ہفتیاں دے لاک ڈاؤن وچ صرف نہایت ضروری میڈیسن تے گروسری دی دکاناں کھولن دی اجازت ہووے گی، پنجاب حکومت نے ایس او پیز دی خلاف ورزی تے وی سخت اقدامات دا فیصلہ کیتا اے۔