وزیراعلیٰ پنجاب نال وزیر قنون بشارت راجہ دی ملاقات، بجٹ سیشن تے تبادلہ خیال

لہور: وزیراعلیٰ پنجاب نال وزیر قنون بشارت راجہ نے ملاقات کیتی جہدے وچ پنجاب اسمبلی دے بجٹ سیشن تے اراکین نوں کورونا توں بچان لئی حفاظتی اقدامات تے گل بات کیتی گئی۔ ایس موقع تے وزیراعلیٰ پنجاب دا کہنا سی اراکین اسمبلی دے تحفظ لئی پنجاب اسمبلی دے بجائے مقامی ہوٹل وچ بجٹ سیشن ہو رہیا اے، کورونا دی وباء نے ہر طبقے نوں متاثر کیتا اے، بجٹ وچ کمزور طبقے دے تحفظ لئی اقدامات تجویز کیتے جان گے، عام بندے نوں ریلیف دین لئی جامع منصوبہ بندی کر لئی گئی اے۔ اگلے مالی ورھے دے بجٹ وچ ہر طبقے دا خیال رکھیا جاوے گا، کورونا دی وجہ توں سرکاری محاصل دی وصولی وچ کمی ہوئی۔ عثمان بزدار دا کہنا سی عام بندے دی معاشی مشکلات دا ازالہ ساڈی پہلی ترجیح اے۔ مشکل ترین حالات وچ وی عوام نوں ریلیف دین والا بجٹ پیش کراں گے، غیر ضروری اخراجات گھٹ کراں گے، پنجاب حکومت نے 2ورھیاں دے دوران عوام نوں سہولتاں اپڑان لئی ریکارڈ قنون سازی کیتی اے، پنجاب اسمبلی دا قنون سازی دے حوالے نال ریکارڈ دوجے صوبیاں دی اسمبلیاں دے مقابلے وچ سب توں بہتر اے، ہر لمحہ عوام دی خدمت لئی وقف اے۔عثمان بزدار آکھیا ساڈی نیت نیک تے سمت درست اے، اپوزیشن صرف نان ایشوز تے سیاست کر رہی اے، تنقید دی پروا کیتے بغیر عوام دی خدمت دے سفر نوں ہور تیزی نال اگے ودھاواں گے۔