ملائیشیا نے ایس ورھے اپنے شہریاں نوں حج تے جان توں روک دتا

ملائیشیا نے کورونا وباء دے پیش نظر ایس ورھے اپنے شہریاں نوں حج تے جان توں روک دتا۔ غیر ملکی خبر رساں ادارے دے مطابق ملائیشیا ولوں ایہ بیان جاری کیتا گیا اے کہ ایس ورھے تقریباً 30ہزار شہریاں نے حج تے جانا سی پر اوہ ہن حج وچ رلت نہیں کر سکن گے، ایہ اقدام کورونا وائرس دی عالمی وباء دے پیش نظر کیتا گیا اے۔ ملائیشیا دے وزیر مذہبی امور آکھیا اسیں ایہ فیصلہ اپنے مسلم تے گوانڈھی ملک انڈونیشیا دے حج بارے اقدامات تے عمل کردیاں ہوئیاں کیتا اے۔ آس اے ایس ورھے حج تے جان والے عازمین حکومت دے ایس فیصلے نوں تسلیم کرن گے۔