سپریم کورٹ دا ریلوے ملازماں دی چھانٹیاں دا حکم

اسلام آباد: سپریم کورٹ نے ریلوے وچ مکمل اوور ہالنگ تے ملازماں دی چھانٹیاں دا حکم دے دتا۔ چیف جسٹس گلزار احمد دی سربراہی وچ سپریم کورٹ دے دو رکنی بنچ نے ریلویز ملازماں دی سروس مستقلی دے حوالے نال دائر وکھو وکھ درخواستاں تے سماعت کیتی۔ عدالت نے اک مہینے وچ ریلوے بارے آپریشن تے ملازماں دی تفصیلی رپورٹ طلب کر لئی۔ سیکرٹری ریلوے عدالت وچ پیش ہوئے تے چیف جسٹس نے اوہناں تے برہمی دا اظہار کردیاں آکھیا تہاڈے توں ریلوے نہیں چل رہی اے، پرسوں جہڑا نقصان ہویا دس دیو ایہدی ذمہ داری کہدی اے، ٹرین یا جہاز دا حادثہ کوئی مذاق نہیں، ریلوے دا سسٹم کرپٹ ہو چکیا اے۔ سپریم کورٹ نے ریلوے وچ مکمل اوور ہالنگ تے ملازماں دی چھانٹیاں دا حکم دیندیاں آکھیا ریلوے وچ نااہل بندے بھرے پئے نیں، ملازمین آپ اپنے محکمے دے نال وفادار نہیں، ریلوے آئے دن حادثیاں دا شکار ہوندی اے جہدے توں بھاری جانی و مالی نقصان ہوندا اے، ایہناں حادثیاں دی نہ کوئی رپورٹ اے تے نہ عملدرآمد، ایس لئی ریلوے فوری طور تے اپنا اصلاحاتی عمل شروع کرے تے غیر ضروری و نااہل ملازماں دی چھانٹی کرے۔