کفایت شعاری مہم، وزیراعظم ہاؤس دے فنڈزتوں 18کروڑ 37 لکھ وزارت خزانہ نوں واپس

اسلام آباد: وزیراعظم عمران خان نے کفایت شعاری مہم تے عمل درآمد کردیاں وزیراعظم سیکرٹریٹ لئی مختص فنڈز وچ 18کروڑ 37لکھ دی بچت کروائی، رقم وزارت خزانہ نوں واپس کر دتی گئی۔ وزیراعظم عمران خان نے کفایت شعاری دا اک ہور وعدہ پورا کیتا، پچھلی حکومتاں نے سرکاری پیسہ بے دریغ اڈاندیاں شاہانہ انداز زندگی اپنا رکھیا سی۔ عمران خان نے وزیراعظم آفس و ہاؤس دے اخراجات وچ 21فیصد تک ریکارڈ کمی کردیاں کفایت شعاری دی مثال قائم کر دتی۔ وزیراعظم سیکرٹریٹ کفایت شعاری وچ سارے 34وفاقی وزارتاں تے 44ڈویژناں تے بازی لے گیا، وزیراعظم آفس تے ہاؤس لئی مختص فنڈز وچ 18کروڑ 37لکھ روپے دی بچت کردیاں وزارت خزانہ نوں واپس کر دتے گئے۔ سال 2019دے دوران وزیراعظم آفس و ہاؤس لئی مختص 86کروڑ 28لکھ روپے وچوں 67کروڑ 92لکھ روپے دے اخراجات ہوئے۔ اگلی وار مالی ورھے 2021لئی وی لگ بھگ 86کروڑ روپے مختص کیتے گئے نیں، واضح رہوے پچھلے سال وزیراعظم ہاؤس دے اخراجات وچ 41فیصد کمی کیتی گئی سی تے سرکاری خزانے نوں 30کروڑ 5لکھ روپے واپس جمع کیتے گئے سن۔