کورونا مریضاں دی خدمت تے مامور طبی شعبہ لئی خصوصی پیکیج لیا رہے آں: ظفر مرزا

اسلام آباد: وزیراعظم دے معاون خصوصی برائے صحت ڈاکٹر ظفر مرزا نے کورونا مریضاں دی خدمات تے مامور طبی شعبہ لئی خصوصی پیکیج لیان دا اعلان کر دتا۔ ظفر مرزا نے اسلام آباد وچ میڈیا بریفنگ دیندیاں آکھیا فرنٹ لائن ورکرز ساڈا اولین دستہ تے ساڈے ہیروز نیں، ایہناں دا تحفظ تے ایہناں دی معاونت اہم ترجیح اے، فرنٹ لائن ورکرز لئی خصوصی پیکیج تے کم کر رہے نیں، ایہ پیکیج کورونا دے خلاف نبرد آزما ڈاکٹرز، طبی عملے لئی ہووے گا۔ ظفر مرزا آکھیا صوبائی وزرا صحت تے ماہرین نال وی ایس پیکیج تے مشاورت کیتی گئی اے، وفاقی تے صوبائی حکومتاں ایس پیکیج تے اطلاق دی ذمہ دار ہون گیاں، خصوصی پیکیج دے 7اہم نکات نیں جہناں وچ مالی مراعات، جان و مال دا تحفظ، ڈاکٹراں تے اہل خانہ دی صحت دا تحفظ، تربیت، صحت دے نجی شعبے نوں مراعات دی فراہمی شامل نیں۔ معاون خصوصی نے دسیا کہ ایس پیکیج وچ فرنٹ لائن ورکرز نوں ٹیکساں وچ چھوٹ دتی جاوے گی، ذمہ داریاں دی ادائیگی دے دوران جاں بحق ہون والے ہیلتھ ورکرز نوں شہداء پیکیج ملے گا۔ اوہناں نے ہور آکھیا چین دے تعاون نال 5ہزار ہیلتھ ورکرز دی ٹریننگ دا وی انتظام کیتا گیا اے۔