میہہ وچ بال نوں بچاؤندے ہوئے کرنٹ لگن نال موت تے کے الیکٹرک تے ہرجانہ
سینئر سول جج وسطی دی عدالت نے میہہ (بارش) وچ کرنٹ لگن نال شہری دی موت تے کے الیکٹرک نوں غفلت دا ذمہ دار قرار دیندے ہوئے اک کروڑ 35 لاکھ روپے ہرجانہ بھرن دا حکم دتا اے۔
درخواست گزار دے وکیل عثمان فاروق ایڈووکیٹ نے آکھیا کہ شیخ سعد احمد 2019 وچ بارش دے دوران بال نوں بجلی دے کھمبے توں کرنٹ لگن توں بچاؤندے ہوئے فوت ہو گیا سی، جیہڑا اپنے ٹبر دا اکو اک کمان والا بندہ سی۔ ایس توں پہلاں علاقے دے لوکاں دیاں شکایتاں دے باجوں وی کے الیکٹرک نے کوئی پکی کارروائی نہیں سی کیتی۔
سنوائی دے دوران کے الیکٹرک دے وکیل نے موقف اپنایا کہ متعلقہ پول اوہناں دی ملکیت نہیں اے۔ پول تے پرائیویٹ جنریٹر، ٹیلی فون تے کیبل دیاں تاراں لگیاں ہوئیاں سن۔ کرنٹ جنریٹر دیاں تاراں توں نکلیا۔ کے الیکٹرک دا سارا سامان محفوظ اے۔ فوت ہون والے نے خطرناک تھاں دے نیڑے جا کے اپنی جان آپ خطرے وچ پائی۔
عدالت نے فیصلہ دتا کہ بجلی دے ادارے تے عوام دی حفاظت دی بہت وڈی ذمہ داری ہوندی اے۔ کھمبے تے دوجے اداروں دیاں تاراں ہون پاروں کے الیکٹرک اپنی ذمہ داری توں پچھا نہیں ہٹ سکدی۔ عام تھاں تے لگے پول وچ کرنٹ ہونا اپنے آپ وچ غفلت دا پکا ثبوت اے۔
عدالت نے ہور آکھیا کہ انسانی جان بچاؤن دی کوشش نوں قانون نرم نظر نال دیکھدا اے۔ فوت ہون والے دی بال نوں بچاؤن دی کوشش نوں پوری غفلت نہیں آکھیا جا سکدا۔ عدالت نے کے الیکٹرک نوں ہدایت کیتی اے کہ جان لیوا حادثات ایکٹ دے تحت ہرجانے دے پیسے 90 دناں دے اندر اندر ٹبر نوں دتے جان۔
