پیٹرول تے ڈیزل توں بعد مٹی دا تیل وی سستا کر دتا گیا

پیٹرول تے ہائی اسپیڈ ڈیزل توں بعد مٹی دا تیل (کیروسین آئل) وی سستا ہو گیا اے۔

نوٹیفیکیشن دے مطابق مٹی دا تیل 7 روپے 23 پیسے فی لیٹر سستا کر دتا گیا اے، جس توں بعد اوہدی نویں قیمت 311 روپے 73 پیسے فی لیٹر ہو گئی اے۔ نوٹیفیکیشن وچ دَسیا گیا اے کہ مٹی دے تیل دی قیمت وچ ایس کمی دا اطلاق اج توں ای ہووے گا۔ ایس توں پہلاں مٹی دے تیل دی قیمت 318 روپے 96 پیسے فی لیٹر سی۔ لنگھے ہفتے وی مٹی دے تیل دی قیمت وچ 41 روپے 80 پیسے فی لیٹر کمی کیتی گئی سی۔

واضح رہے کہ حکومت نے پیٹرولیم مصنوعات دیاں قیمتاں وچ کمی دا اعلان کیتا سی۔ پیٹرولیم ڈویژن دے مطابق پیٹرول دی قیمت وچ فی لیٹر 5 روپے کمی کیتی گئی اے جس توں بعد پیٹرول دی نویں قیمت 409 روپے 78 پیسے فی لیٹر ہو گئی اے۔ ایس دے نال ای ڈیزل دی قیمت وچ وی 5 روپے فی لیٹر کمی کیتی گئی اے جس توں بعد ڈیزل دی نویں قیمت 409 روپے 58 پیسے فی لیٹر ہو گئی اے۔