سمارٹ لاک ڈاؤن، کراچی، لہور، اسلام آباد وچ درجناں علاقے سیل کرن دا فیصلہ

کورونا وائرس دے ودھدے ہوئے کیساں دے پیش نظر سرکار نے سمارٹ لاک ڈاؤن دی حکمت عملی دے تحت زیادہ متاثرہ علاقیاں نوں سیل کرن دا فیصلہ کیتا اے۔ لہور وچ چیف سیکرٹری پنجاب جواد رفیق ملک دی زیر سربراہی اجلاس ہویا جہدے وچ زیادہ کیساں والے سارے علاقیاں نوں سیل کرن دا حکم دے دتا گیا۔ شہر دے 55مقامات نوں سیل کرن دا فیسلہ کیتا گیا اے جہناں دی حتمی فہرست چیف سیکرٹری پنجاب نوں پیش کر دتی گئی اے۔ انتظامیہ نے کورونا ہاٹ سپاٹس نوں سیل کرن دی کاروائی شروع کر دتی اے۔ اودھر کراچی وچ ضلع غربی وچ بلدیہ تے سائٹ دے علاقیاں وچ دو یونین کونسل (یوسیز) نوں سربمہر کرن دا فیصلہ کیتا گیا اے۔ ڈپٹی کمشنر ضلع غربی فیاض سولنگی دے مطابق محکمہ صحت دی موصولہ رپورٹ دے مطابق متاثرہ علاقیاں نوں سیل کیتا جا رہیا اے۔ وسیلیاں دے مطابق شہر دے 15توں ودھ وکھو وکھ علاقیاں نوں سربمہر کیتا جا سکدا اے۔ضلعی ہیلتھ افسر (ڈی ایچ او) ویسٹ نے ڈپٹی کمشنر نوں خط لکھ کے کورونا وائرس دا پھیلاؤ روکن لئی 16یوسیز وچ سمارٹ لاک ڈاؤن نافذ کرن دی سفارش کردیاں دسیا مریضاں دی تعداد دے لحاظ نال سائٹ پہلے تے بلدیہ ٹاؤن دوجے نمبر اُتے اے۔ دوجے پاسے وفاقی دارالحکومت اسلام آباد دی انتظامیہ نے تیزی نال ودھدے کورونا کیساں دی وجہ توں 2سیکٹرز نوں سیل کرن دا فیصلہ کیتا اے۔ سیکٹر آئی ایٹ وچ اک دن وچ کورونا دے دو سو کیس تے سیکٹر آئی 10وچ چار سو کیسز ساہمنے آ چکے نیں۔ ڈپٹی کمشنر حمزہ شفقات دے مطابق اگلے 24گھنٹیاں وچ ایہناں علاقیاں نوں سیل کرن دا نوٹیفکیشن جاری ہو سکدا اے۔