پٹرولیم قیمتاں وچ کمی دا فیدہ عوام نوں اپڑایا جائے: عمران خان
اسلام آباد: وزیراعظم عمران خان آکھیا اے سرکار ولوں پٹرول تے ڈیزل دی قیمتاں وچ کمی دا مقصد عوام نوں ہر ممکن ریلیف فراہم کرنا سی پر حکومتی فیصلے دے ثمرات عوام نوں اپڑان لئی سارے صوبائی چیف سیکرٹری مشترکہ حکمت عملی بنان۔ وزیراعظم دی زیر صدارت اشیائے ضروریہ دی قیمتاں وچ کمی دے حوالے نال اجلاس ہویا۔ چاراں صوبائی چیف سیکرٹریاں نے وزیراعظم نوں بریفنگ دتی۔ اجلاس نوں دسیا گیا گندم دی بین الصوبائی نقل و حرکت دی اجازت دین دے فیصلے دے مثبت نتائج ساہمنے آنا شروع ہو گئے نیں پر آٹے دی قیمتاں وچ ہور کمی لیان دے حوالے نال اقدامات جاری نیں۔ اجلاس وچ فخر امام، عبدالحفیظ شیخ، عبدالرزاق داؤد، ڈاکٹر شہباز گل تے دوجے شریک ہوئے، صوبائی چیف سیکرٹریاں نے ویڈیو لنک دے راہیں رلت کیتی۔ عمران خان آکھیا اے اشیائے ضروریہ وچ ملاوٹ ساڈے بالاں، بڈھیاں تے قوم دی صحت دی خرابی دا باعث بن رہی اے۔ ماضی وچ ملاوٹ دا تدارک کرن نوں نظر انداز کیتا گیا۔ خالص اشیاء دا میسر آنا گڈ گورننس دی عکاسی کردا اے ایس لئی ایس امر تے خصوصی توجہ دتی جائے۔
