“مریم نواز نے ورلڈ اربن فورم وچ پنجاب پویلین دا افتتاح کر دتا اے۔”

“وزیراعلیٰ پنجاب نے ورلڈ اربن فورم وچ پنجاب پویلین دا افتتاح کر دتا اے۔ آذربائیجان دے دارالحکومت باکو وچ پنجاب پویلین دے افتتاح بارے گل بات کردیاں مریم نواز دا کہنا سی کہ پنجاب پویلین ورلڈ اربن فورم وچ توجہ دا مرکز بن گیا اے۔ اوہناں نے پویلین پنجاب دے سٹاف دی کارکردگی نوں سراہیا تے وکھو وکھ پروگراماں بارے بریفنگ لئی، ایس موقعے تے اوہناں نے وکھو وکھ سٹالز دا دورہ وی کیتا۔ وزیراعلیٰ پنجاب نے فورم وچ اے آئی (AI) گیجٹس نوں ویکھیا تے سٹال ہولڈرز نال خوشگوار ماحول وچ گل بات وی کیتی، جدکہ وفاقی وزیر موسمیاتی تبدیلی مصدق ملک وی اوہناں دے نال سن۔ پنجاب پویلین وچ پنجاب حکومت دے فلیگ شپ منصوبے ’اپنی چھت، اپنا گھر‘ دی دستاویزی فلم (Documentary) وی وکھائی گئی، جس وچ سکیم دے تحت بنن والے گھراں دے ثبوت وکھائے گئے۔ دستاویزی فلم وچ عوام دی خوشی ویکھ کے عالمی میڈیا تے معزز مہماناں نے وزیراعلیٰ مریم نواز شریف لئی تالیاں وجا کے داد دتی۔ حکام دا کہنا سی کہ صرف اک سال دے عرصے وچ ’اپنی چھت، اپنا گھر‘ سکیم دے تحت اک لکھ توں زیادہ گھر مکمل کیتے گئے نیں۔ پنجاب پویلین وچ شامل عالمی وفداں تے میڈیا دے نمائندیاں نے ’اپنی چھت، اپنا گھر‘ منصوبے دی تعریف کردیاں وزیراعلیٰ مریم نواز شریف دے ویژن تے عوامی کماں نوں خراجِ تحسین پیش کیتا۔ چیتے رہے کہ ایس فورم وچ پنجاب پویلین راہیں ترقیاتی تے شہری منصوبیاں نوں عالمی پدھر تے پیش کیتا جا رہا اے۔”