کورونا دے معیشت تے اثرات، صحت دے بجٹ تے ماہانہ نظرثانی ہووے گی: ہاشم جواں بخت

لہور: وزیر خزانہ پنجاب ہاشم جواں بخت آکھیا اے کورونا دے معیشت تے اثرات ہوئے نیں، صحت دے بجٹ تے ماہانہ نظرثانی ہووے گی، غیر معمولی حالات وچ وی ترقیاتی بجٹ رکھیا گیا، صحت تے تعلیم دے نال پبلک ورکس پروگرام وی ترجیحات وچ شامل اے۔ وزیر خزانہ پنجاب ہاشم جواں بخت نے میڈیا نال گل کردیاں آکھیا ایس بجٹ دا 106ارب کورونا وائرس بارے اے، کورونا دے معیشت تے کیہ اثرات ہوندے نیں تے محکمہ صحت لئی کناں بجٹ چاہیدا ہووے گا ایہدے لئی ہر مہینے نظرثانی کراں گے، پچھلے ورھے 9ہسپتال تے 6یونیورسٹیاں دے قیام دی گل کیتی سی۔ ایس بجٹ وچ وی صحت تے تعلیم نوں ترجیح دتی اے، سرکار نے بجٹ دی ترجیحات وچ پبلک ورکس پروگرام نوں بہت اہمیت دتی اے۔ہاشم جواں بخت دا کہنا سی ایہ ویلا ساڈی معیشت تے ہیلتھ کیئر سسٹم لئی بہت تشویشناک اے، آس اے اسیں ایس غیر یقینی صورتحال توں جلد نکلاں گے، کورونا اجہی وباء اے جہدے وچ فیصلے کرنے وی پین گے تے واپس وی لینے پین گے۔ ساڈے لئی مشکل سی کہ وفاقی تے صوبائی محصولات نوں پچھلے بجٹ نال موازنہ کیتا جائے۔