“تعلیمی اداروں وچ 3 مہینیاں دیاں چھٹیاں دے خلاف دائر درخواست تے عدالت نے پنجاب حکومت توں جواب منگ لیا اے۔”

“لاہور ہائیکورٹ وچ پنجاب دے تعلیمی اداروں وچ تن مہینیاں دیاں چھٹیاں دین دے خلاف دائر درخواست تے سماعت ہوئی۔ عدالت نے ایس درخواست تے پنجاب حکومت سمیت دوجیاں دھریاں نوں نوٹس جاری کر کے جواب منگ لیا اے، جسٹس خالد اسحاق نے آل پرائیویٹ سکولز فیڈریشن دی درخواست تے سماعت کیتی۔ درخواست وچ موقف اپنایا گیا اے کہ پنجاب حکومت نے گرمیاں دیاں چھٹیاں لئی تن مہینیاں تیکر تعلیمی ادارے بند رکھن دا نوٹیفکیشن جاری کیتا اے۔ پاکستان وچ تعلیمی سال گھٹ کے صرف 120 دناں دا رہ گیا اے، جدکہ امریکہ تے انگلینڈ سمیت وڈے ملکاں وچ تعلیمی سال 230 دناں دا ہوندا اے۔ درخواست وچ آکھیا گیا کہ تن مہینے تعلیمی ادارے بند رکھن نال بالاں دی پڑھائی دا تگڑا نقصان ہوئے گا، تے تعلیم توں بغیر کوئی وی معاشرہ ترقی نہیں کر سکدا۔ درخواست وچ عدالت توں منگ کیتی گئی اے کہ 3 ماہ دیاں چھٹیاں دا نوٹیفکیشن منسوخ (کالعدم) کیتا جائے تے گرمیاں دیاں چھٹیاں نوں گھٹ کر کے 6 توں 8 ہفتیاں تیکر کرن دا حکم دتا جائے۔”