کراچی: نالے وچ ڈِگ کے شہری دی ہلاکت، ٹی ایم سی اورنگی قصوروار قرار، ٹبر نوں ڈیڑھ کروڑ روپے دا ہرجاݨہ دیݨ دا حکم
کراچی: نالے وچ ڈِگ کے شہری دی ہلاکت دا معاملہ، عدالت نے ٹی ایم سی اورنگی نوں ذمہ دار قرار دے کے متاثرہ ٹبر نوں ڈیڑھ کروڑ روپے دیݨ دا حکم سݨا دتا
کراچی: سینئر سول جج غربی دی عدالت نے بارشاں دے دوران نالے وچ ڈِگ کے شہری دی ہلاکت دے کیس وچ وڈا فیصلہ سݨا دتے ہوئے، حادثے دا قصوروار ٹاؤن میونسپل کارپوریشن (TMC) اورنگی نوں قرار دتا اے، جدکہ کے ایم سی (KMC) نوں کیس وچوں بری الزمہ کر دتا اے۔
عدالت نے اپنے فیصلے وچ سخت ریمارکس دیندیاں آکھیا کہ:
“اج کل دی جدید ٹیکنالوجی تے موسمیاتی نظام بارشاں دی بالکل پکی تے ویلے سر پیشگوئی کرن دی طاقت رکھدے نیں۔ ایہہ متعلقہ حکام دی نااہلی تے ناکامی اے کہ اوہناں نے پہلے توں بچاؤ دے انتظام نہیں کیتے تے خطرناک مین ہولاں نوں بند نہیں کیتا۔ ٹی ایم سی دی غفلت تے لاپرواہی والا رویہ ہی ایس ناگہانی موت دا اصل ذمہ دار اے۔”
درخواست گزار دے وکیل عثمان فاروق ایڈووکیٹ نے عدالت نوں دَسیا کہ سال ۲۰۲۰ء وچ ہووݨ والی تیز بارشاں دے دوران متوفی عارف قریشی گھر واپس آ رہا سی کہ نالے وچ ڈِگ کے شدید زخمی ہویا تے بعد وچ جان دی بازی ہار گیا۔ وکیل دا کہنا سی کہ انتظامیہ دی ناہلی پاروں نالے دی دیکھ بھال ماڑی سی تے اوہدے تے کوئی ڈھکن (کور) وی نہیں سی۔
دوجے پاسے، ٹی ایم سی اورنگی ٹاؤن نے اپنا پکھ (مؤقف) رکھدیاں آکھیا کہ بارشاں وچ سارے حفاظتی انتظام کیتے گئے سن، درخواست گزار دے الزامات جھوٹے نیں تے ایہہ کیس سݨݨ دے لائق ہی نہیں اے۔
عدالت نے دوہاں دھریاں (فریقین) دے دلیلاں سݨن توں بعد ریمارکس دتے کہ ٹی ایم سی دی لاپرواہی پاروں متوفی دی قیمتی جان گئی، ایس لئی ٹاؤن میونسپل کارپوریشن اورنگی متوفی دے ٹبر نوں ڈیڑھ کروڑ روپے ہرجاݨہ ادا کرے۔
