سٹیل ملز دی نجکاری، ملازماں دی برطرفی تے وفاقی حکومت نوں نوٹس

کراچی: سندھ ہائی کورٹ نے پاکستان سٹیل ملز دی نجکاری تے ہزاراں ملازماں نوں نوکری توں کڈھن بارے درخواست تے وفاقی حکومت، وزارت پیداوار تے اٹارنی جنرل سنے دوجیاں نوں نوٹس جاری کردیاں سٹیل ملز بارے سپریم کورٹ وچ زیر سماعت معاملے دی تفصیلات طلب کر لئیاں۔ جسٹس عمر سیال تے جسٹس ذوالفقار علی سانگی تے مشتمل دو رکنی بنچ دے ساہمنے پاکستان سٹیل ملز دی نجکاری تے ہزاراں ملازماں نوں نوکری توں کڈھن بارے درخواست دی سماعت ہوئی۔ درخواست گزار دے وکیل نے موقف اختیار کیتا پاکستان سٹیل ملز نوں ایس حالت وچ اپڑان دے ذمے دار ملازمین ہرگز نہیں، ماضی دی حکومتاں دی غلط پالیسیاں توں سٹیل ملز نوں خسارہ ہویا، پی ٹی آئی حکومت نے وی 2ورھے وچ سٹیل ملز چلان لئی کوئی اقدام نہیں کیتا، وفاقی حکومت سٹیل ملز نجی شعبے نوں دینا چاہندی اے، وفاقی حکومت نے ہزاراں ملازماں نوں کڈھن دا غیر قنونی فیصلہ کیتا اے، وفاقی حکومت دے اقدام نوں غیر قنونی قرار دتا جائے، وفاقی حکومت نوں نجکاری تے ملازماں نوں کڈھن توں روکیا جائے۔عدالت نے وفاقی حکومت توں سٹیل ملز دی نجکاری بارے تفصیلات طلب کر لئیاں، عدالت نے اٹارنی جنرل پاکستان نوں 23جون تک وفاقی حکومت توں جواب لے کے جمع کران دا حکم دے دتا، عدالت نے سٹیل ملز بارے سپریم کورٹ وچ زیر سماعت معاملے دی وی تفصیلات طلب کر لئیاں۔