وفاقی کابینہ دا بیرون ملک پاکستانیاں لئی انٹرنیشنل فلائٹس بحال کرن دا فیصلہ

اسلام آباد: وفاقی کابینہ نے بیرون ملک پاکستانیاں لئی بین الاقوامی فلائٹس بحال کرن دا فیصلہ کیتا اے۔ وزیراعظم عمران خان دی زیر صدارت وفاقی کابینہ دا اجلاس ہویا جہدے وچ بیرون ملک (اوورسیز) پاکستانیاں لئی مرحلہ وار انٹرنیشنل فلائٹس بحال کرن دا فیصلہ کیتا گیا۔ وزیراعظم عمران خان نے متعلقہ حکام نوں ایکشن پلان تیار کرن دی ہدایت کردیاں آکھیا اوورسیز پاکستانیاں نوں مشکل ویلے وچ کلیاں نہیں چھڈاں گے، کورونا وباء دی وجہ توں لکھاں پاکستانی روزگار توں محروم ہوئے جہدا دکھ اے، حکومت پاکستان اپنے ہم وطن بھین بھراواں دی ہر ممکن مدد لئی تیار اے۔ وسیلیاں دے مطابق ابتدائی طور تے عرب ملکاں لئی بین الاقوامی پروازاں بحال کرن دا فیصلہ کیتا گیا اے جتھوں پاکستانیاں دی محفوظ وطن واپسی دے بعد اگلہ مرحلہ شروع ہووے گا، سب توں پہلاں بے روزگار ہون والے مزدور تے محنت کشاں نوں وطن واپس لیایا جائے گا۔ اجلاس وچ کورونا مریضاں دی لوڑ دی دواواں تے انجیکشنز دی ودھ قیمتاں وصولی تے بحث ہوئی تے پٹرول دی قلت تے وی گل کیتی گئی۔وزیراعظم دے معاون خصوصی پٹرولیم ندیم بابر نے دسیا پٹرول پمپاں نے پٹرول ذخیرہ کیتا ہویا اے جہدے تے کئی آئل کمپنیاں تے پٹرول پمپاں دے خلاف کاروائیاں کیتیاں نیں۔ شاہ محمود قریشی آکھیا وزارت پٹرولیم بحران دی ذمہ داری قبول کرے تے فوری طور تے ذمہ داراں دا تعین کرکے کاروائی کیتی جائے۔