پاکستان دا تمام کشمیری سیاسی قیدیاں تے انسانی حقوق دے کارکناں دی رہائی دا مطالبہ
کشمیری قیدیاں دی رہائی، پاک چین تعلقات تے اہم عالمی معاملیاں اُتے دفتر خارجہ دی بریفنگ
دفتر خارجہ دے ترجمان طاہر حسین اندرابی ہوراں پریس بریفنگ چ مختلف اہم ملکی تے عالمی معاملیاں اُتے گل بات کیتی اے۔ خبر دی تفصیل تھلے دتی گئی اے:
1۔ مقبوضہ کشمیر تے بھارتی مظالم
کشمیری قیدیاں دی رہائی دا مطالبہ: پاکستان نے سارے کشمیری سیاسی قیدیاں تے انسانی حقوق دے کارکناں دی فوری رہائی دا مطالبہ کیتا اے۔
بھارتی بربریت: ترجمان دا کہنا سی کہ بھارت مقبوضہ کشمیر وچ انسانی حقوق لئی اٹھن والی اوازاں نوں دبان دی کوشس کر رہا اے تے عالمی برادری ایس ظلم دی گواہ اے۔
پاکستان اُتے بے بنیاد الزام: بھارت کشمیر وچ اپنے مظالماں توں دوجیاں دا دھیان ہٹان لئی پاکستان اُتے الزام لاؤندا اے۔ کلبھوشن یادیو دا کیس بھارت دی ریاستی دہشت گردی دا وڈا ثبوت اے۔ بھارت کشمیریاں دی ازادی دی جنگ نوں دہشت گردی نہیں کہہ سکدا۔
2۔ پاک چین تعلقات تے وزیر اعظم دا دورہ
دوستی دے 75 سال: پاک چین دوستی دے 75 سال پورے ہون تے سرکاری پدھر اُتے تقریباں ہوئیاں نیں۔ دوہاں ملکاں نے ہر اوکھے ویلے اک دوجے دا ساتھ دتا اے۔
وزیر اعظم دا دورہ چین: وزیر اعظم شہباز شریف 23 توں 26 مئی تک چین دا دورہ کر رہے نیں، جس نال دوہاں ملکاں دی “آل ویدر اسٹریٹجک پارٹنرشپ” ہور مضبوط ہووے گی۔ وزیر اعظم اوتھے پاک چین بزنس کانفرنس دی صدارت کرن گے تے چینی صدر شی جن پنگ تے وزیر اعظم لی چیانگ نال ملاقاتاں وی کرن گے۔
3۔ ایران تے سعودی عرب دے معاملے
پاک ایران تعلقات: وزیر داخلہ محسن نقوی نے ایران دے دو دورے کیتے نیں جتھے ایرانی قیادت نال سکیورٹی تے دو طرفہ تعلقات اُتے تفصیلی گل بات ہوئی اے۔
ڈرون حملیاں دی مذمت: 17 مئی نوں سعودی عرب تے یو اے ای دی فضائی حدود وچ ڈرون حملیاں دی پاکستان نے سخت مذمت کیتی اے۔ ترجمان نے کہیا کہ ایٹمی تنصیبات نوں نشانہ بنانا عالمی قونون دی خلاف ورزی اے تے پاکستان امید کردا اے کہ اجیہے واقعے دوبارہ نہیں ہون گے۔
4۔ سندھ طاس معاہدہ تے روس نال تعلقات
پانی دے حقوق دا تحفظ: پاکستان سندھ طاس معاہدے دے تحت اپنے حقوق لئی قانونی تے سفارتی طریقے ورتدا رہے گا۔ بھارت ولوں ثالثی عدالت دے فیصلے نوں منن توں انکار کرنا کوئی قانونی حیثیت نہیں رکھدا۔
پاک روس مشاورت: پاکستان تے روس وچکار عالمی سلامتی تے اسلحے دے کنٹرول اُتے تفصیلی گل بات ہوئی اے۔ دوہاں ملکاں نے عالمی فورماں اُتے تعاون ودھان دا فیصلہ کیتا اے تے اگلا اجلاس 2027 وچ اسلام آباد وچ ہووے گا۔
امن دیاں کوششاں: ترجمان نے واضح کیتا کہ دہشت گردی دے خاتمے لئی پاکستان دیاں قُربانیاں پوری دنیا دے سامنے نیں تے امن دیاں کوششاں لئی پورا ملک تے ادارے اک پیج اُتے نیں، ایس لئی ایس معاملے اُتے قیاس آرائیاں توں پرہیز کیتا جائے۔
