بھارت وچ پاکستانی سفارتخانے دا گھیراؤ تے چینی فوج تے حملہ، شہباز شریف دی شدید مذمت
لہور: قائد حزب اختلاف شہباز شریف نے نئی دہلی وچ پاکستانی سفارتخانے دے گھیراؤ تے چینی فوجاں تے حملے تے بھارت دی شدید مذمت کیتی اے۔ سماجی رابطے دی ویب سائٹ ٹویٹر تے جاری بیان وچ اوہناں دا کہنا سی دنیا کورونا وباء نال لڑ رہی اے تے بھارت تے جنگ دا جنون سوار اے۔ چینی فوج تے بھارتی حملہ انتہائی قابل مذمت تے خطے نوں عدم استحکام نال دوچار کرن دی مذموم سازش اے۔ چین دی امن پسند اجتماعی خوشحالی دی پالیسی نال بھارت حسد دی اگ وچ سڑ رہیا اے۔ شہباز شریف آکھیا مقبوضہ جموں و کشمیر دے اندر ظلم و ستم دی انتہا، لداخ وچ شر انگیزی تے ایل او سی تے بلا جواز جنگ بندی دی خلاف ورزیاں بھارتی جارحیت دی کھلی مثالاں نیں۔لیگی رہنما آکھیا اقوام متحدہ تے سلامتی کونسل خاموش تماشائی نہ بنے سگوں بھارتی جنگی جنون روکن لئی کردار ادا کرے۔ پاکستان دے عوام چین دی حمایت کردے نیں تے ہر بھارتی جارحیت دے خلاف چین دے عوام دے نال نیں۔ اوہناں دا کہنا سی نئی دہلی وچ پاکستانی ہائی کمیشن دا گھیراؤ تے سفارتی عملے نوں دھمکانا کم ظرف سوچ دا اظہار اے۔ نریندر مودی گوانڈھیاں دے نال نہیں کورونا وائرس دے خلاف لڑن تے خطے دے امن نوں تباہ نہ کرن۔
