لہورہائیکورٹ دی آٹزم متاثرہ بچی دے نان و نفقہ متعلق درخواستاں مسترد

لاہور ہائیکورٹ نے آٹزم توں متاثرہ بچی دے نان و نفقہ (خرچے) دے تعین بارے دائر درخواستاں تے فیصلہ سنانودیاں بچی دا خرچہ ودھاؤن تے والد ولوں خرچہ گھٹ کرن دی، دوویں درخواستاں مسترد کر دتیاں نیں۔

جسٹس عابد حسین چٹھہ نے علیہا نورالامین مینگل دی درخواست تے تحریری فیصلہ جاری کیتا، درخواست گزار نے فیملی عدالت دے ایس فیصلے نوں چیلنج کیتا سی جیہدے وچ آٹسٹک بچی دا مہینے دا خرچہ ایک لاکھ روپے مقرر کیتا گیا سی۔

درخواست وچ مؤقف اپنایا گیا کہ آٹزم دا شکار بچیاں دی پڑھائی، علاج تے دوجیاں ضروتاں تے عام بچیاں دے مقابلے چار گنا زیادہ خرچہ آؤندا اے، ایس لئی اوہناں دے نان و نفقہ دا فیسلہ کرن لئی اک وکھرا معیار مقرر کیتا جانا چاہیدا اے۔

درخواست گزار مطابق، نورالامین مینگل دی پہلی بیوی توں اولاد مہنگے تعلیمی اداریاں بشمول ایچی سن کالج وچ پڑھ رہی اے، جدکہ اوہناں دا رہن سہن اوہناں دی ظاہر تے لُکی ہوئی (خفیہ) آمدنی نوں دَسدا اے، درخواست وچ اکھیا گیا کہ فیملی عدالت نے والد دی مالی حیثیت دے باجود آٹسٹک بچی دے اخراجات گھٹ مقرر کیتے۔

دوجے پاسے، نورالامین مینگل دے وکیل نے مؤقف اختیار کیتا کہ فیملی عدالت نے بچی دا خرچہ زیادہ مقرر کیتا اے تے ایہنوں گھٹ کر کے 50 ہزار روپے کیتا جائے۔

عدالت نے اپنے فیصلے وچ قرار دتا کہ فیملی عدالت تے اپیل عدالت نے سارے حقائق تے حالات دا جائزہ لین توں بعد بالکل ٹھیک (مناسب) فیصلہ کیتا۔

جسٹس عابد حسین چٹھہ نے اکھیا کہ لاہور ہائیکورٹ آئینی درخواست وچ فیملی تے اپیل عدالتوں دے فیصلے (فائنڈنگ) وچ مداخلت نہیں کر سکدی۔