پاکستان ریلوے دا پشاور توں کراچی تیکر عوام ایکسپریس دا آغاز
پاکستان ریلویز نے پشاور توں کراچی تیکر نویں “عوام ایکسپریس” ٹرین سروس دی شروعات کر دتی اے۔
سیکرٹری تے چیئرمین ریلویز سید مظہر علی شاہ نے نویں ٹرین سروس دا افتتاح پشاور کینٹ ریلوے سٹیشن وچ کیتا، ایس افتتاحی تقریب وچ سابق کرکٹر شاہد آفریدی نے وی شرکت کیتی۔
نویاں تے جدید سہولتاں نال لیس عوام ایکسپریس وچ 8 ایئر کنڈیشنڈ (AC) بوگیاں، آرام دہ سیٹاں سمیت دوجیاں سہولتاں موجود نیں، جیہدے وچ 1234 مسافر سفر کر سکن گے۔
اپ گریڈ کیتی گئی عوام ایکسپریس دی پہلی ٹرین ساڑھے 8 بجے پشاور توں کراچی لئی روانہ ہوئی، جیہڑی پشاور توں براستہ راولپنڈی، لاہور، خانیوال، ملتان، بہاولپور، خان پور، لیاقت پور، رحیم یار خان، صادق آباد، ڈہرکی، پنوں عاقل، روہڑی، نواب شاہ، ٹنڈو آدم تے حیدرآباد توں ہوندیاں ہویاں کراچی پہنچے گی۔
سیکرٹری تے چیئرمین پاکستان ریلویز سید مظہر علی شاہ نے عوام ایکسپریس دی افتتاحی تقریب نال خطاب کردیاں اکھیا کہ ٹرین وچ مسافروں نوں جدید سہولتاں وی دتیاں جا رہیاں نیں، جدید ٹرین وچ سفر کرن والیاں نوں جی آیاں نوں (خوش آمدید) آکھدے آں۔
اوہناں دا کہنا سی کہ کوئٹہ حادثے نال ساڈے حوصلے پست نہیں ہو سکدے، پاکستان ریلوے قومی یکجہتی دی نشانی اے، ریلوے سروسز نوں ہور بہتر کراں گے، ساڈی ریلوے سروسز دا پہیہ کدی نہیں رکے گا، ریلوے دی نویں سروسز تے بزنس دوویں ہور مضبوط ہو رہے نیں۔
سابق قومی کرکٹر شاہد آفریدی نے تقریب نال خطاب وچ اکھیا کہ کوئٹہ دے واقعے تے بڑا دکھ (افسوس) ہویا، اللہ پاک شہدا دے درجات بلند فرمائے، پاکستان ریلوے نوں نویں ٹرین دی شروعات تے ودھائی (مبارکباد) دیندا واں، کینٹ سٹیشن تے شاہد آفریدی فاؤنڈیشن ولوں پانی صاف کرن والا (واٹر فلٹریشن) پلانٹ لگایا گیا اے۔
