کراچی: شاہراہِ فیصل اتے اج توں لین دی خلاف ورزی کرن تے ای چالان لاگو
ٹریفک قوانین اتے پکے طریقے نال عمل کروان لئی اج توں شارع فیصل اتے لین دی خلاف ورزی کرن والے ڈرائیوراں دے خلاف ای چالان دا نظام لاگو کر دتا گیا اے۔
ٹریفک پولیس دے ترجمان دے مطابق شروع دے مرحلے وچ ایہ قدم صرف شارع فیصل تک ہی رکھیا گیا اے، پر اگلے مرحلیاں وچ اس نظام نوں شہر دیاں دوجیاں اہم سڑکاں تے شاہراہواں تک وی ودھایا جائے گا۔
ٹریفک پولیس دے مطابق اس قدم دا مقصد شارع فیصل اتے ٹریفک دے نظام نوں ہور سچجا (منظم) تے چنگا بنانا اے، شہریاں اگے اپیل کیتی گئی اے کہ اوہ اپنیاں گڈیاں متھّے ہوئے (مقررہ) لین وچ ای چلان تاں جے ٹریفک دی روانی بنی رہے تے حادثیاں وچ کمی لائی جا سکے۔
ترجمان دے مطابق سڑکاں اتے لگے کیمریاں دی مدد نال لین دی خلاف ورزی کرن والیاں دی پچھان کیتی جائے گی، جس توں بعد ای چالان متعلقہ بندیاں نوں اوہناں دے موبائل فون یا گھر دے پتے اتے گھل دتا جائے گا۔
ٹریفک افسراں دا کہنا اے کہ اس منصوبے دے شروع ہون توں پہلاں لوکاں دی جانکاری لئی اک مہم وی چلائی گئی سی تاں جے شہریاں نوں نویں نظام بارے پتا لگ سکے، افسراں نے اس گل اتے وی زور دتا کہ ٹریفک دا ڈسپلن قائم رکھن وچ عوام دا ساتھ بہت ضروری اے۔
ٹریفک پولیس دے مطابق لین ڈسپلن نوں پکا کرن نال سڑکاں اتے ٹریفک دی روانی بہتر ہووے گی، جدکہ حادثیاں وچ کمی آئے گی تے محفوظ سفر نوں ہلاشیری (فروغ) ملے گی۔
