بی این پی مینگل نے پی ٹی آئی نال اتحاد ختم کر دتا

کوئٹہ: بلوچستان نیشنل پارٹی (مینگل) نے تحریک انصاف نال اتحاد ختم کرن دا اعلان کر دتا۔ قومی اسمبلی وچ بجٹ تے بحث دے دوران بلوچستان نیشنل پارٹی (مینگل) دے سربراہ سردار اختر جان مینگل نے تحریک انصاف نال اتحاد ختم کرن دا اعلان کیتا۔ اوہناں آکھیا اسیں ایوان وچ موجود رہواں گے تے اپنی آواز اُچی کردے رہواں گے۔ اجلاس دے دوران اظہار خیال کردیاں اختر جان مینگل آکھیا بلوچستان تہاڈا مقروض نہیں، جے حساب کرو تے تہاڈا اک اک وال بلوچستان دا قرض دار ہووے گا، سوئی گیس دی رائلٹی تے چھڈو، سانوں گیس سنگھن نوں وی نہیں ملدی، میرے بلوچ دا خون کیوں زیر بحث نہیں آندا، کیہ ایہدا رنگ ٹماٹر دے رنگ توں ودھ خراب اے، سانوں کوئی لائن وچ نہیں لگن دیندا، تسیں آن لائن دی گل کر رہے او، لوکاں دے مینوں میسجز آئے کہ ساڈے بالاں نوں نہ پڑھاؤ، جے ساڈے بچے پڑھ گئے تے حق تے ناحق وچ فرق کرنا سیکھ جان گے۔ بلوچستان نوں برابر دا حصہ دینا ہووے گا، اج نہیں تے کل دینا ضرور ہووے گا۔ واضح رہوے بی این پی مینگل دی علیحدگی دے بعد وفاقی حکومت قومی اسمبلی وچ چار ووٹاں توں محروم ہو گئی اے، ایہدے علاوہ سینیٹ وچ وی اک ووٹ گھٹ ہو گیا اے، ایس طرح تحریک انصاف لئی مسلم لیگ (ق) ، ایم کیو ایم، بی اے پی تے جی ڈی اے دی اہمیت ودھ گئی اے۔