وزیراعلیٰ پنجاب دی ہدایت تے اینٹی کرپشن متحرک، 1ارب توں ودھ دی اراضی واگزار

لہور: وزیراعلیٰ پنجاب دی ہدایت تے اینٹی کرپشن پنجاب نے صوبہ بھر وچ قبضہ مافیا تے کرپشن دے خلاف کاروائیاں تیز کردیاں ہوئیاں 6مہینے دے دوران 1ارب 40کروڑ روپے مالیت دی تقریباً 1400کینال اراضی واگزار کر لئی۔ وزیراعلیٰ پنجاب نے صوبے نوں کرپشن فری بنان دے عزم دا اظہار کیتا اے۔ محکمہ اینٹی کرپشن پنجاب دی موبائل ایپ تے 6مہینے دے دوران 2809شکایتاں موصول ہوئیاں، 140انکوائریاں شروع کیتی گئیاں، 17لکھ روپے دی کیش ریکوری وی کیتی گئی۔ عثمان بزدار آکھیا موبائل ایپ دے راہیں شکایتاں تے کاروائی دے مثبت نتائج ساہمنے آ رہے نیں، شہری اپنی حفاظت لئی شکایت دے اندراج لئی موبائل ایپ استعمال کرن، پنجاب وچ کرپشن دے خلاف نوٹالرنس دی پالیسی جاری رہوے گی، کرپشن دے ناسور دا خاتمہ ساڈی سرکار دی ترجیح اے۔ وزیراعلیٰ پنجاب دا کہنا سی قبضہ مافیا دے خلاف بلاامتیاز کاروائی لئی ہدایات جاری کر دتی گئیاں نیں، قبضہ مافیا دی سرکوبی لئی آخری حد تک جاواں گے۔