پٹرول دی قلت پیدا کرن والیاں دے خلاف فوجداری مقدمے درج کراواں گے: لہور ہائیکورٹ

لہور: لہور ہائی کورٹ آکھیا اے پٹرول دی قلت پیدا کرن والیاں دے خلاف فوجداری مقدمے درج کراواں گے، ذمہ داراں نوں گرفتار کرکے جیل وچ سُٹاں گے۔ لہور ہائی کورٹ وچ پٹرولیم مصنوعات دی قلت دے خلاف درخواست تے سنوائی ہوئی۔ چیف جسٹس ہائی کورٹ نے استفسار کیتا سب توں پہلاں پٹرول دا بحران کتھے پیدا ہویا؟ جہدے تے سیکرٹری پٹرولیم آکھیا پٹرول دا بحران میان والی تے دوجے ضلعیاں وچ پیدا ہویا۔ چیف جسٹس قاسم خان نے ریمارکس دتے کہ میانوالی وزیراعظم دا حلقہ اے، وزارت پٹرولیم نے صرف ایسے حلقہ وچ زیادہ توجہ دتی، وزیراعظم نے اپنے حلقے دی وجہ توں پٹرول بحران ختم کرن دا آکھیا، ایہ خراب گورننس دی اعلیٰ مثال اے۔ چیف جسٹس قاسم خان نے ریمارکس دتے دیس نوں چیئرپرسن اوگرا تباہ کر رہی اے، چیئرپرسن اوگرا دی حاضری معافی دی عرضی رد کرنے آں، چیئرپرسن اوگرا کام نہیں کر سکدی تے استعفیٰ دے دیوے۔ لہور ہائی کورٹ نے اگلی سماعت تے وزیراعظم دے پرنسپل سیکرٹری نوں طلب کر لیا۔ چیف جسٹس ہائی کورٹ آکھیا وزیراعظم دے پرنسل سیکرٹری دے جواب توں مطمئن نہیں، ایس معاملے تے جوڈیشل کمیشن بنا سکنے آں، جوڈیشل کمیشن رپورٹ دی روشنی وچ کاروائی ہووے گی۔