لہور ہائیکورٹ: بجلی تے گیس دی لوڈشیڈنگ بارے درخواست مسترد درخواست گزار تے جرمانہ لا دتا گیا
لاہور ہائیکورٹ نے بجلی تے گیس دی غیر اعلانیہ لوڈشیڈنگ بارے درخواست نوں غیر مستند تے گول مول (مبہم) قرار دے کے مسترد کر دتا اے تے نال ای درخواست گزار تے جرمانہ وی لا دتا اے۔
لاہور ہائیکورٹ دے جسٹس خالد اسحاق نے بجلی تے گیس دی غیر اعلانیہ لوڈشینگ بارے درخواست دا 15 صفحیاں تے مشتمل حکم نامہ جاری کیتا۔
عدالت ولوں متعلقہ فورم (صحیح جگہ) رجوع کیتے بغیر درخواست دائر کرن تے درخواست گزار تے اک لاکھ روپے جرمانہ لایا گیا اے۔ عدالت نے دَسیا کہ درخواست گزار کول انصاف (داد رسی) لئی متعلقہ فورم موجود سی، پر اوہنے اوہنوں ورتے بغیر سِدھی پٹیشن دائر کر دتی، جَد کہ اوہنے لوڈ شیڈنگ، ٹیرف، لائن لاسز تے پالیسی دے مسلیاں تے کوئی پکا ثبوت یا گراؤنڈز وی پیش نہیں کیتے۔
عدالت نے آکھیا کہ توانائی دے بحران ورگے اوکھے (پیچیدہ) مسلیاں دا حل متعلقہ اداریاں تے پالیسی توں نکلے گا، تکنیکی تے پالیسی دے مسئلے ایگزیکٹو تے ریگولیٹری باڈیز دے دائرہ کار (اختیار) وچ ہوندے نیں۔ مفادِ عامہ دی درخواستاں اک اہم ہتھیار نیں جِہنوں دھیان نال ورتنا چاہیدا اے، مفادِ عامہ دے پِچھے شہرت دی بھکھ تے بدنیتی نہیں لُکی ہونی چاہیدی۔ ہائیکورٹ دا فرض اے کہ ایسی درخواستاں دا حوصلہ توڑے (حوصلہ شکنی کرے) تاں جے انصاف دا راہ گندا (آلودہ) نہ ہووے۔
عدالت نے ریمارکس دتے کہ مفادِ عامہ دی پیٹیشن لئی لازمی اے کہ درخواست گزار پکے تے سچے حقائق بیان کرے، قیاس آرائی، فرضی یا بدنیتی تے مبنی درخواست مفادِ عامہ دے ناں تے سُݨی (قابلِ سماعت) نہیں جا سکدی۔ عدالتی مداخلت اوتوں تیکر ٹھیک نہیں جَد تیکر بنیادی حقاں دی خلاف ورزی نہ ہووے۔ عدالتی وسیلیاں تے ویلے دا ضیاع (بربادی) روکن لئی ایسی درخواستاں تے جرمانہ لاوݨا ضروری اے۔
عدالت نے آکھیا کہ درخواست گزار نے پٹیشن وچ اک سرٹیفکیٹ لا کے دَسیا سی کہ اوہ متبادل فورم ورت چکیا اے، پر درخواست گزار دا لایا گیا اوہ سرٹیفکیٹ وی جھوٹا نکلیا۔ درخواست گزار اک لاکھ روپے بطور جرمانہ ہائیکورٹ بار دی ڈسپنسری وچ جمع کروائے تے جرمانے دی رسیڈ 45 دِناں دے اندر ڈپٹی رجسٹرار کول جمع کروائے۔
