سندھ دے سرکاری ملازماں لئی خوشخبری، تنخواہواں وچ وادھے دا فیصلہ

کراچی: اگلے مالی ورھے دے بجٹ وچ سرکاری ملازماں لئی خوشخبری، سندھ سرکار نے گریڈ 1توں 16دے ملازماں دی تنخواہواں وچ 10فیصد جد کہ گریڈ 17توں اُتے دے ملازماں دی تنخواہواں وچ پنج فیصد وادھے دا فیصلہ کیتا اے۔ دوجے پاسے وزیراعلیٰ سندھ مراد علی شاہ دی زیر صدارت سندھ کابینہ دا اجلاس ہویا جہدے وچ نویں مالی ورھے دے بجٹ دے حوالے نال سیکرٹری فنانس نے بریفنگ دتی۔ سندھ کابینہ نے نویں مالی ورھے دے بجٹ دی منظوری دے دتی۔ وزیراعلیٰ سندھ مراد علی شاہ آکھیا سرکاری ملازماں، کاشتکاراں تے پرائیویٹ سیکٹر نوں ریلیف دتا جاوے گا، مشکلات دے باوجود ترقیاتی کماں لئی بجٹ رکھیا اے، کوشش کیتی اے اک متوازن بجٹ پیش کریئے۔