کراچی غریب پرور شہر اےچاہواں گا ہنزہ وی کراچی جیہا بنےمرتضیٰ وہاب دا خرم دستگیر نوں جواب
میئر کراچی مرتضیٰ وہاب نے لیگی رہنما خرم دستگیر دے بیان تے ردعمل دیندیاں ہویاں آکھیا اے کہ کراچی غریب پرور شہر اے تے میں چاہواں گا ہنزہ وی کراچی جیہا بݨے۔
گلگت بلتستان الیکشن مہم دے دوران کراچی تے لاہور دی ترقی دے بارے مسلم لیگ (ن) دے رہنما خرم دستگیر نوں جواب دیندیاں ہویاں مرتضیٰ وہاب نے آکھیا کہ لیگی رہنما ہنزہ وچ الیکشن مہم دوران کہہ رہے سن کہ ہنزہ لاہور جیہا ہووے یا کراچی جیہا ہووے، خرم دستگیر آکھ رہے سن 5 سالاں وچ گلگت بلتستان پنجاب جیہا ہووے یا صوبہ سندھ جیہا۔
اوہناں نے آکھیا کہ سندھ وچ سیلاب دی تباہ کاری آؤندی اے تاں حکومت عوام دے نال کھلوتی رہندی اے جد کہ مشکل حالات وچ پنجاب حکومت نظر آوے نہ آوے، چیئرمین پی پی (بلاول بھٹو) عوام دے نال ہوندے نیں۔ میئر کراچی نے آکھیا کہ سندھ حکومت ولوں 21 لاکھ گھر سیلاب متاثرین لئی بݨائے جا رہے نیں جِہناں وچوں 12 لاکھ گھر سیلاب توں متاثر لوکاں دے حوالے کیتے جا چکے نیں۔
مرتضیٰ وہاب دا آکھݨ سی کہ لاہور دا موازنہ کردے نیں کراچی شہر نال، کراچی تاں غریب پرور شہر اے، کراچی تاں اوہ شہر اے جِس وچ پاکستان دے وکھو وکھ شہراں توں لوگ آؤندے نیں، کراچی غریباں دی مدد کردا اے، میں تاں چاہواں گا کہ ہنزہ کراچی جیہا بݨے تے ملک دی خدمت کرے، لوکاں نوں کھوکھلے دعویاں ول جاݨ دی بجائے درست حکمتِ عملی ول جاݨا چاہیدا اے۔
