سیرامک ٹائلز تے شیشہ سازی دی صنعتاں دی درآمدی ڈیوٹیاں وچ ہور کمی دی تجویز اُتے تحفظات دا اظہار
سیرامک ٹائلز تے شیشہ سازی دی ایسوسی ایشنز نے آکھیا اے کہ آؤندے بجٹ وچ سیرامک ٹائلز تے شیشے دی امپورٹ (درآمد) اتے ڈیوٹیاں وچ ہور کمی کیتی گئی تاں ایہ صنعتاں پورے طریقے نال بند ہو جاؤݨ گیاں۔
سیرامک ٹائلز تے شیشہ سازی دی ایسوسی ایشنز نے وزیر اعظم دے معاونِ خصوصی ہارون اختر خان نوں خط لکھ دتے نیں، جِس وچ آکھیا گیا اے کہ موجودہ معاشی حالات تے پالیسی دے رپھڑاں (مسائل) پاروں پہلے ہی دوویں صنعتاں 50 فیصد بند ہو چکیاں نیں۔
سیرامک ٹائلز تے شیشہ سازی دی صنعتاں نے نیشنل ٹیرف پالیسی 2025-30 کے تحت امپورٹ ڈیوٹیاں وچ ہور کمی دی تجویز اتے ڈاڈھے (شدید) تحفظات دا اظہار کردیاں ہویاں خبردار کیتا اے کہ جے لوکل صنعت نوں پورا تحفظ نہ دتا گیا تاں دوویں شعبے پورے بند ہووݨ دے خطرے وچ آ سکدے نیں۔
سیرامک ٹائل انڈسٹری دے سیکرٹری جنرل عاطف اقبال نے اپنے خط وچ مؤقف اپنایا کہ امپورٹ ڈیوٹیاں وچ ہور کمی نال سستیاں امپورٹڈ ٹائلز دی آمد وچ وادھا ہوسی، جِس دا مقابلہ کرنا لوکل انڈسٹری لئی ممکن نہیں رہوے گا۔
اوہناں نے خبردار کیتا کہ ایس دے نتیجے وچ پاکستان دی سیرامک ٹائلز انڈسٹری پوری تالابندی (بندش) ول جا سکدی اے، جِس نال وڈے پدھر (بڑے پیمانے) اتے روزگار تے معیشت متاثر ہوسی۔
دوجے پاسے پاکستان گلاس مینوفیکچررز ایسوسی ایشن دے سیکرٹری جنرل داؤد الرشید نے آکھیا کہ شیشے دی امپورٹ اتے ڈیوٹیاں ہور گھٹائݨ نال مقامی گلاس انڈسٹری ڈاڈھے دباؤ دا شکار ہو جاوے گی۔
اوہناں نے آکھیا کہ شیشہ سازی دی صنعت پہلے ہی ادھی پیداواری صلاحیت تک محدود ہو چکی اے تے ہور امپورٹ سہولتاں دیݨ نال مقامی سرمایہ کاری، روزگار تے معیشت نوں تگڑا (بھاری) نقصان پہنچے گا۔
