دشمن نوں پہلے توں ودھ طاقتور جواب دین لئی تیار آں، ترجمان ایرانی نیشنل سکیورٹی کمیشن

ایران دی نیشنل سکیورٹی اینڈ فارن پالیسی کمیشن دے ترجمان ابراہیم رضائی دا کہنا اے کہ سانوں کسے بھی قسم دی مس کیلکولیشن دا شکار نہیں ہونا چاہیدا، امن تے استحکام دا راہ داخلی محاذ دی مضبوطی تے جدوجہد توں ہو کے لنگھدا اے۔

ابراہیم رضائی نے آکھیا کہ جے تسی دشمن نوں فیصلہ کن جواب دین لئی اپنے آپ نوں تیار نہیں کردے تاں جنگ تہاڈے بوہے تے دستک دیوے گی، جنگ بندی توں بعد ایرانی فوجاں نے اپنی صلاحیتاں وچ وادھا تے نقصانات دا ازالہ کر لیا اے۔

اوہناں نے آکھیا کہ اسیں 9 مارچ دے مقابلے وچ کتے زیادہ طاقتور جواب دین لئی تیار آں، اس ویلے تیکر چپ نہیں بہاں گے جدوں تیکر دشمن شرمندگی محسوس نہ کرے، اس ویلے تیکر خاموش نہیں رہاں گے جدوں تیکر دشمن اپنی سوچ تے حکمتِ عملی وچ تبدیلی نہ لے آوے۔

چیتے رہے کہ ایران تے اسرائیل وچکار لنگھے ہوئے دن توں اک دوجے تے کئی حملے کیتے جا چکے نیں۔ امریکی صدر ڈونلڈ ٹرمپ نے اسرائیلی وزیراعظم بنیامین نیتن یاہو نوں ٹیلی فون کر کے خبردار کیتا سی کہ جے اسرائیل نے ایران تے حملہ کیتا تاں امریکہ اسرائیل دا ساتھ نہیں دیوے گا پر صیہونی وزیراعظم نے صدر ٹرمپ دے فون دے کجھ ہی گھنٹیاں بعد ایران تے میزائل حملیاں دا مینہہ وسا دتا، جس دے جواب وچ ایران ولوں بھی بھرپور جوابی حملے کیتے جا رہے نیں۔