چینی صدر دا شمالی کوریا دا دورہ، کم جونگ اُن تے شمالی کوریا دی غیر متزلزل حمایت جاری رکھن دا اعلان
چینی صدر شی جن پنگ نے اپنے دورہ شمالی کوریا دے دوران شمالی کوریا تے اس دے رہنما کم جونگ اُن دے نال بیجنگ دی حمایت نوں ’غیر متزلزل‘ قرار دتا اے۔
چینی میڈیا دے مطابق 2019 توں بعد شمالی کوریا دے اپنے پہلے دورے دے موقعے اُتے شی جن پنگ تے اوہناں دی اہلیہ پینگ لی یوان دا پیانگ یانگ انٹرنیشنل ایئرپورٹ اُتے کم جونگ اُن تے اوہناں دی اہلیہ ری سول جو نے استقبال کیتا۔
چینی صدر نے پیر نوں شمالی کوریا دے دو روزہ دورے دے آغاز اُتے کم جونگ اُن نال ملاقات دے دوران آکھیا کہ چین دی کمیونسٹ پارٹی تے اس دی حکومت دا چین تے شمالی کوریا دے درمیان روایتی دوستی نوں اہمیت دین دا مؤقف تبدیل نہیں ہووے گا۔
چینی سرکاری خبر ایجنسی شنہوا دے مطابق شی جن پنگ نے دوواں ملکاں دے درمیان خارجہ پالیسی، قانون نافذ کرن والے اداریاں تے دفاعی شعبیاں سمیت مختلف شعبیاں وچ ہر پدھر (سطح) اُتے تبادلیاں تے تعاون نوں ہور مضبوط بناون اُتے زور دتا۔
ایہ دورہ رواں سال شی جن پنگ دا پہلا غیر ملکی دورہ اے تے ایہ ایسے ویلے وچ ہو رہیا اے جدوں اوہ بیجنگ وچ امریکی صدر ڈونلڈ ٹرمپ تے روسی صدر ولادیمیر پیوٹن نال حالیہ ملاقاتاں کر چکے نیں۔
