بغاوت تے ریاست مخالف سرگرمیاں دے الزامات، آزاد کشمیر حکومت نے شوکت نواز میر تے خواجہ مہران ارشد خلاف قانونی کارروائی شروع کر دتی
محکمہ داخلہ حکومت آزاد کشمیر نے شوکت نواز میر تے خواجہ مہران ارشد خلاف بغاوت تے ریاست مخالف سرگرمیاں دے الزامات ہیٹھ باضابطہ قانونی کارروائی دا آغاز کر دتا۔
حکومت آزاد کشمیر نے جرم آمیز تقاریر، تحریراں، اشاعتاں تے الیکٹرانک مواصلات (رابطہ کاری) بارے تحقیقات دا حکم دے دتا۔
شوکت نواز میر دے خلاف دفعہ اے 124 تعزیراتِ آزاد جموں و کشمیر دے تحت تحقیقات دا حکم دتا گیا، محکمہ داخلہ آزاد کشمیر دے مطابق لبھے ہوئے مواد دے جائزے توں بعد طے کیتے گئے الزامات قانون دے مطابق ہور تفتیش دے متقاضی (لوڑوند) نیں۔
ضابطہ فوجداری دی دفعہ 196 دے تحت متعلقہ ضلعی پولیس سربراہان (ڈی پی اوز) نوں تحقیقات پوریاں کرن دی ہدایت کر دتی گئی۔
متعلقہ ضلعی پولیس سربراہان نوں تحقیقات پوریاں کر کے متعلقہ عدالت وچ چالان پیش کرن دی ہدایت جاری کر دتی گئی، 6 جون نوں لیک ہون والی آڈیو توں بعد راولاکوٹ وچ پرتشدد واقعات وچکار مماثلت (اکو جیہا ہونا) نے تحقیقات نوں ہور مضبوط کیتا اے۔
حکومت ولوں ایس ایس پی مظفرآباد نوں شوکت نواز میر دے خلاف تحقیقات پوریاں کرن دی ہدایت کیتی گئی، ایس ایس پی میرپور نوں وی خواجہ مہران ارشد دے خلاف تحقیقات پوریاں کرن دی ہدایت جاری کر دتی گئی اے۔
یاد رہے کہ پچھلے دیہاڑ (گزشتہ روز) کالعدم جوائنٹ ایکشن کمیٹی دے مرکزی رہنماواں دی مبینہ آڈیو ساہمنے آئی سی، جس وچ مرکزی رہنما شوکت نواز میر تے خواجہ مہران نوں آزاد کشمیر وچ احتجاج بارے گل کردیاں سنیا گیا۔
