افغان شہریاں نوں پاکستانی پاسپورٹ جاری کرن دا معاملہ، ایف آئی اے دی تفتیش وچ اہم انکشافات
افغان شہریاں نوں پاکستانی پاسپورٹ جاری کرن دے معاملے اُتے ایف آئی اے دی تفتیش جاری اے جیہدے وچ اہم انکشافات سامنے آئے نیں۔
حکام دے مطابق پکیّاں خبراں ملیاں نیں کہ اک باقاعدہ مجرمانہ نیٹ ورک— جیہدے وچ سہولت کار، ایجنٹ، فرضی شناخت والے بندے، محکمہ پاسپورٹ تے نادرا کے سرکاری اہلکار شامل نیں— غیر قانونی طور اُتے افغان شہریاں نوں پاکستانی شہری وکھا کے پاسپورٹ جاری کروان وچ ملوث اے۔
ایہہ وی پڑھو:
- ہمشکلاں دے پاسپورٹ اُتے پاکستان آؤن والی زنانی سمیت 5 افغان شہری ڈی پورٹ
- باہرلے ملک توں جعلی پاکستانی پاسپورٹ اُتے کراچی آؤن والا افغان شہری گرفتار
- افغانیاں نوں شناختی کارڈ جاری کرن دا الزام، پاسپورٹ تے نادرا دے 7 افسر گرفتار
ایہ نیٹ ورک جعلی، بوگس، ہیر پھیر کیتیاں ہوئیاں تے دھوکہ دہی اُتے مبنی دستاویزاں، جیویں کہ فیملی رجسٹریشن سرٹیفکیٹ (FRC)، کمپیوٹرائزڈ ریکارڈ تے دوجے شناختی کاغذات تیار تے استعمال کردا سی تاکہ غیر ملکی شہریاں نوں پاکستانی شہری وکھا کے اوہناں نوں پاسپورٹ بنوان وچ مدد دِتی جا سکے۔
معلومات دے مطابق کُل 72 افغان شہریاں نوں کراچی دے پاسپورٹ آفس عوامی مرکز برانچ توں پاکستانی پاسپورٹ جاری کیتے گئے، ایہناں وچوں 53 پاسپورٹ اسسٹنٹ ڈائریکٹر فاروق سیال نے پراسیس کیتے جَد کہ باقی 19 پاسپورٹ نائٹ شفٹ انچارج محمد باقر رضا نے پراسیس کیتے۔
ایہہ وی پتہ لگیا اے کہ ایہ پاسپورٹ طے شدہ قنوناں تے ضابطیاں دی خلاف ورزی کردے ہوئے تے درخواست دین والیاں دی شناخت تے شہریت نوں لُکا کے جاری کیتے گئے۔
ایس اطلاع اُتے ایف آئی اے کاؤنٹر ٹیررازم ونگ کراچی وچ انکوائری درج کیتی گئی، جیہدے توں بعد تفتیشی افسر تے عملے نے کراچی دے ریجنل پاسپورٹ آفس (صدر) توں سارے 72 درخواست فارم تے متعلقہ ریکارڈ اپنے قبضے وچ لے لِیا۔
شروع دی جانچ پڑتال توں ایہناں درخواستاں وچ کئی مشکوک گلاں، گڑبڑاں تے وڈی ہیر پھیر سامنے آئی اے، جیہڑی کسے اک ادھ واقعے دی بجائے اک باقاعدہ مجرمانہ منصوبے ول اشارہ کردی اے۔
جانچ توں ایہہ گل سامنے آئی کہ کئی پاسپورٹ جعلی یا مشکوک کاغذات دی بنیاد اُتے جاری کیتے گئے، کئی کیساں وچ فیملی رجسٹریشن سرٹیفکیٹاں تے دوجے کاغذات وچ تضاد، بے قاعدگیاں تے مشکوک نشانیاں ملیاں جیہناں توں اوہناں دی اصل حیثیت اُتے وڈے سوال کھڑے ہوندے نیں۔
ایس توں علاوہ کئی درخواستاں وچ تصویراں وچ ہیر پھیر (ٹیمپیرنگ) دے ثبوت وی ملے نیں جیہدا مقصد اصل شناخت نوں لُکانا سی۔ اِنج ہی وکھو وکھ درخواستاں وچ اکو جہے تے بار بار استعمال ہون والے فون نمبر پائے گئے جیہڑے بظاہر غیر متعلقہ بندیاں دے ناں اُتے سن۔
ایہہ اک بالکل صاف تے منظم طریقہ اے جیہڑا دَسدا اے کہ ایہناں درخواستاں دے پِچھے سانجھے ایجنٹ یا سہولت کار کم کر رہے سن، تے اوہناں نوں پاسپورٹ تے نادرا دے اہلکاراں دی پوری پوری ملی بھگت حاصل سی۔
