اوپن اے آئی ولوں چیٹ جی پی ٹی نوں سُپر ایپ وچ بدلن دا فیصلہ
اوپن اے آئی ولوں کمپنی دے آرٹی فیشل انٹیلی جنس (اے آئی) چیٹ بوٹ “چیٹ جی پی ٹی” نوں سُپر ایپ وچ بدلیا جا رہا اے۔
فنانشنل ٹائمز دی اک رپورٹ دے مطابق اوپن اے آئی چیٹ جی پی ٹی نوں کوڈنگ ٹولز تے اے آئی ایجنٹس اُتے مبنی سُپر ایپ وچ بدلنا چاہندی اے تاکہ اسٹاک مارکیٹ وچ جان توں پہلاں اپنی آمدنی نوں ودھایا جا سکے۔
اوپن اے آئی دے اندر ایس حوالے نال اہم تبدیلیاں کیتیاں جان گیاں تے وسائل نوں وڈے کارپوریٹ اکاؤنٹس حاصل کرن لئی ورتیا جائے گا، جدکہ حریف کمپنی “اینتھروپک” (Anthropic) نال مقابلے بازی نوں وی تیز کیتا جائے گا۔ ایس اوور ہال (تبدیلی) نال اوپن اے آئی دی کوڈنگ پراڈکٹ “کوڈیکس” نوں زیادہ وسائل مل سکن گے۔
رپورٹ وچ ہور دَسیا گیا کہ اوپن اے آئی ولوں چیٹ جی پی ٹی دے انٹرفیس نوں نویں پرامپٹس (Prompts) تے فیچرز دے ذریعے ہور بہتر بنایا جائے گا۔ ایہناں پرامپٹس تے فیچرز نوں اِنج ڈیزائن کیتا گیا اے کہ ایہہ صارفین نوں کوڈنگ ٹولز، امیج جنریشن تے تھرڈ پارٹی سروسز (جیویں کینوا وغیرہ) ول لے کے جان۔
کمپنی نوں امید اے کہ اوہدی شیئر آمدنی وچ ایس سال دے آخر تک 50 فیصد اضافہ ہوئے گا کیونکہ کوڈیکس ورتن والے ہر مہینے فیس دین گے۔ چیتے رہے کہ چیٹ جی پی ٹی دے ماہانہ صارفین دی گنتی اک ارب تک پہنچ چکی اے، جِہناں وچوں 5 کروڑ صارف ہر مہینے فیس دیندے نیں۔
