حکومت دا تنخواہ دار طبقے دے 4 سلیباں تے ٹیکس چ کمی تے سرچارج ختم کرن دا اعلان
وفاقی وزیرخزانہ محمد اورنگزیب نے قومی اسمبلی چ بجٹ پیش کردیاں ہوئیاں آکھیا کہ وزیر اعظم شہباز شریف دی حکومت سرکاری تے نجی تنخواہ دار طبقے دیاں مشکلاں توں واقف اے۔
وزیرخزانہ نے آکھیا وزیر اعظم پاکستان دی ہدایت تے اج مینوں اے اعلان کردیاں ہوئیاں خوشی محسوس ہو رہی اے کہ ساڈی حکومت نے آمدنی دیاں چار سلیباں (slabs) دے تنخواہ دار بندیاں نوں ریلیف فراہم کرن دا فیصلہ کیتا اے۔
وزیرخزانہ نے آکھیا ایس سلسلے چ جیہڑے تنخواہ دار بائیس (22) توں بتیس (32) لاکھ روپے دے درمیان سالانہ کماندے نیں، اونہاں دے ٹیکس دی شرح (23) فیصد توں گھٹ کر کے (20) فیصد کرن دی تجویز اے، بتیس (32) توں اکتالیس (41) لاکھ روپے دے درمیان آمدن والے تنخواہ داراں لئی ٹیکس دی شرح 30 فیصد توں گھٹ کر کے 25 فیصد کرن دی تجویز اے۔
وزیرخزانہ نے بجٹ تقریر چ آکھیا کہ اکتالیس (41) توں چھپن (56) لاکھ روپے آمدن والیاں لئی انکم ٹیکس دی شرح 35 فیصد توں گھٹ کر کے 29 فیصد دی تجویز اے، اسی طرح چھپن (56) لاکھ توں ستر (70) لاکھ روپے تک تنخواہ حاصل کرن والیاں لئی ٹیکس دی شرح 35 فیصد توں گھٹ کر کے 32 فیصد کرن دی تجویز اے۔
